एकलहरे येथे एकावर टोळक्याचा हल्ला

जेलरोड पंचक एसबी प्लाझा इमारतीत राहणारे अशोक बबन रांधवन यांनी दिलेल्या फिर्यादीत म्हटले आहे की, शुक्रवारी रात्री कारमधून मित्र हरिष पाटील याला निर्मल सोसायटी येथे सोडविण्यास गेलेले असतांना संजय दिलीप जाधव रा. ट्रॅक्शनजवळ याने शिवीगाळ सुरु केली. जाधवसह सुधीर पगारे, संदीप बागूल, अजय बागूल, सागर सोनवणे, विशाल सोनवणे, राहुल म्हस्के, अक्षय म्हस्के व त्यांचे तीन-चार साथीदार यांनी शिवीगाळ करुन लाथा बुक्क्यांनी मारहाण केली. जाधवने चाकूसारख्या हत्याराने हाताच्या दंडावर वार करुन जखमी केले. यावेळी मित्र हरिष पाटील व समाधान बोराळे हे मदतीस आले असता त्यांनाही मारहाण केल्याचे फिर्यादीत म्हटले आहे. दीड तासानंतर राहुल राजेंद्र साठे, शंकर मल्लेश बाली हे निर्मल सोसायटी येथून जात असताना काही कारण नसताना या संशयितांनी त्यांनाही मारहाण करुन वार करुन जखमी केले. याप्रकरणी नाशिकरोड पोलीस ठाण्यात गुन्हा दाखल करण्यात आला आहे.