गणेशभक्तांना लागले उत्सवाचे वेध...

कारागीर व्यस्त : गणेशोत्सव तयारीला वेग; कुटुंब रंगलेय सजावटीच्या नियोजनात

पंचवटी : विघ्नहर्त्या गणरायाच्या आगमनाला अवघ्या अकरा दिवसांचा कालावधी शिल्लक असून, लाडक्या गणरायाच्या स्वागतासाठी तमाम गणेशभक्त सज्ज झाले आहेत. लाडक्या गणरायाचे घरात आगमन होण्यापूर्वी त्याच्या बैठकीच्या जागेची कशाप्रकारे सजावट करता येईल यासाठी कारागीर व्यस्त झाले असून, थर्माकॉलची मंदिरे बनविण्याच्या कामाला कारागिरांनी गती दिली आहे. सध्या बाजारात थर्माकॉलपासून बनविलेली मंदिरे विक्रीसाठी दाखल झाली असून, काही कारागीर तयार केलेल्या मंदिरांवर शेवटचा हात फिरवून सजावट करत आहेत. लाडक्या गणरायाला घरात आणल्यानंतर त्याच्या स्थापनेची जागा निश्चित करून घरातही सजावटीसाठी थर्माकॉलपासून तयार केलेली चित्ररथांची मंदिरे, मोराच्या आकाराची तसेच महालाच्या प्रतिमेच्या मंदिरांचा उपयोग करून घेत आहेत. थर्माकॉलपासून मंदिरे बनविणारे कारागीर व त्यांचे संपूर्ण कुटुंबीय सध्या या कामात गुंतलेले असून, रात्रीचा दिवस करत आहेत. गणेश चतुर्थीला अकरा दिवसांचा कालावधी असला तरी सजावटीचे साहित्य तयार करणाऱ्या कारागिरांसाठी ही वेळ स्पर्धेची आहे. कमी कालावधीत जास्तीत जास्त चांगली मंदिरे तयार करून ती ग्राहकांना उपलब्ध करून देण्यासाठी त्यांची धावपळ सुरू आहे. थर्माकॉलपासून तयार केलेल्या आकर्षक मंदिरांना अकराशे ते पाच हजार रुपयांपर्यंतची किंमत मिळते, असे कारागिरांकडून सांगितले जात आहे. कारागिरांनी स्वत:च्या कलेनुसार तर ग्राहकांना हवी असलेल्या आकारानुसार थर्माकॉलची मंदिरे तयार करण्याचे काम सुरू असून, गणेश प्रतिष्ठापनेच्या पाच ते सहा दिवस अगोदर काम पूर्ण करून ते बाजारात विक्रीसाठी उपलब्ध करून देण्याचा मानस असल्याचे कारागिरांनी सांगितले. (वार्ताहर)