गणपती बाप्पा मोरया, मंगलमूर्ती मोरया

नाशिकरोड परिसर : गुलालाची उधळण आणि वाद्यांच्या गजरात ‘श्रीं’ची प्रतिष्ठापना

नाशिकरोड : गणपती बाप्पा मोररया, मंगलमूर्ती मोरया’च्या जयघोषात ढोल-ताशांच्या गजरात गुलालाची उधळण करीत सार्वजनिक मंडळांनी व घरगुती श्रीगणरायाची स्थापना करण्यात आली. नाशिकरोड-उपनगर पोलीस ठाण्याच्या हद्दीत १५० सार्वजनिक छोट्या-मोठ्या मंडळांनी श्री गणरायाची स्थापना केली आहे.परिसरामध्ये सोमवारी सकाळ पासून संपूर्ण कुटुंब लाडक्या गणरायाला घेण्यासाठी मूर्ती विक्रीच्या स्टॉलवर दाखल झाले होते. बिटको चौकाजवळील जेलरोड येथे असलेल्या मूर्ती स्टॉलवर सकाळपासून सायंकाळपर्यंत भाविकांची मूर्ती घेण्यासाठी मोठी गर्दी झाली होती. श्री गणरायाच्या आगमनाचे बाल-गोपाळांमध्ये मोठे आकर्षण असल्याचे चित्र सर्वत्र बघायला मिळत होते. घरातील मोठ्यांसोबत पारंपरिक वेशभुषेत आलेले बाल-गोपाळ गणपती बाप्पाचा जयघोष करत लाडक्या गणरायाला घेऊन जात असल्याचे चित्र सर्वत्र दिसत होते. घराघरामध्ये मोठ्या भक्तिभावाने विधीवत गणरायाची स्थापना करण्यात आली. तर सोसायटी, कॉलनीतील मंडळांनीदेखील वाजत-गाजत गणरायाची स्थापना केली. जी फाउंडेशन, ओंकार मित्रमंडळ, ओम गुरूदेव मित्रमंडळ, श्री शनैश्चर मित्रमंडळ, मातोश्री फ्रेंड सर्कल, ईगल स्पोर्टस् अ‍ॅन्ड सोशल क्लब, अनुराधा फ्रेंड सर्कल, मनपा कर्मचारी गणेशोत्सव मंडळ, बालाजी सोशल फाऊंडेशन, व्यापारी बॅँक कर्मचारी गणेशोत्सव मंडळ, वर्धमान मित्रमंडळ, श्री गणेश एकता कला-क्रीडा मंडळ, श्री सप्तशृंगी मित्रमंडळ, श्री महालक्ष्मी मित्रमंडळ, स्वराज्य मित्रमंडळ, श्री गजानन मित्रमंडळ, श्री म्हसोबा महाराज मित्रमंडळ, साईराज मित्रमंडळ, जय भद्रा मित्रमंडळ आदि सार्वजनिक छोट्या-मोठ्या मंडळांनी ढोल-ताशे व डिजेच्या गजरात मिरवणूक काढत श्री गणरायाची विधीवत स्थापना केली.