माजी आमदार संजय पवार होणार भाजपात दाखल

माजी आमदार संजय पवार होणार भाजपात दाखल

नांदगाव : शिवसेनेचे माजी आमदार संजय पवार भाजपामध्ये प्रवेश करणार असल्याचे वृत्त असून, येत्या रविवारी (दि. २३) मुख्यमंत्री देवेंद्र फडणवीस व भाजपाचे प्रदेशाध्यक्ष रावसाहेब दानवे यांच्या उपस्थितीत शिर्डी येथील कार्यक्रमात हा प्रवेश सोहळा होणार आहे. पवार यांनी या वृत्ताला दुजोरा दिला आहे.खासदार हरिश्चंद्र चव्हाण यांनी आज मुख्यमंत्री फडणवीस यांच्याशी मोबाइलवरून पवार यांचे बोलणे करून दिल्यावर प्रवेशाच्या निर्णयावर शिक्कामोर्तब झाले. माजी मंत्री प्रशांत हिरे, आमदार अपूर्व हिरे यांची पवार यांनी भेट घेतल्यानंतर पवार भाजपामध्ये प्रवेश करणार असल्याच्या चर्चा सुरू होत्या. दरम्यान, अद्वय हिरे यांच्याशी झालेल्या बैठकीत पवार यांचा विचार पक्का झाला.शिवसेनेत गेला काही काळ पवार यांची घुसमट होत असल्याच्या बातम्या येत होत्या. या पार्श्वभूमीवर गेले काही दिवस पवार यांचे मन वळविण्यासाठी शिवसेनेतून प्रयत्न सुरू होते. आज कांदे व ज्येष्ठ नेते बापूसाहेब कवडे यांनी पवार यांची मनधरणी करण्याचे केलेले प्रयत्न विफल ठरले. दरम्यान, पवार यांनी त्यांच्या कार्यकर्त्यांच्या गाठीभेटी घेऊन त्यांची सहमती मिळवली. (वार्ताहर)