नाशिक: राष्ट्रीय महामार्ग क्रमांक-३ वरील के. के. वाघ ते कोणार्कनगर दरम्यान सुरू असलेला उ्ड्डाणपूल पुढील महिन्यात खुला होणार असल्याने महामार्गावरील वाहतूक कोंडीचा प्रश्न मिटणार आहे. मागीलवर्षी कोरेानामुळे मजूर गावी गेल्याने येथील कामाला मे २०२१ महिन्यांपर्यंत मुदतवाढ देण्यात आली होती. यंदाही कामाला कोरोनाचा फटका बसला असला तरी सद्य:स्थितीत पुलाचे काम जवळपास ९२ टक्के काम पूर्ण झाल्याने पुढील महिन्यात उड्डाणपूल खुले करण्याचे नियोजन करण्यात आले आहे.
मुंबई-आग्रा महामार्गावर के. के. वाघ ते कोणार्कनगर मार्गावर वाढलेली वर्दळ तसेच सातत्याने होणाऱ्या अपघातामुळे या मार्गावर उड्डाणपुलाच्या कामाला २०१८ मध्ये सुरुवात झाली होती. काम सुरू झाल्यापासून २४ महिन्यांत काम पूर्ण करण्याची मुदत देण्यात आलेली होती म्हणजेच ऑक्टेाबर २०२० मध्ये या पुलाचे काम पूर्ण होऊन वाहतुकीस खुला होणे अपेक्षित होते. परंतु मागीलवर्षी कोरेानाच्या संकटामुळे मजूर आपापल्या गावी निघून गेल्याने येथील कामकाजावर परिणाम झाला. दोन ते अडीच महिने कामगार परतलेच नसल्याने कामकाजाची गती काहीशी मंदावली होती. अशाही परिस्थितीत मोजक्याच कामगारांच्या भरवशावर कामकाज सुरू होते. त्यानुसार मे महिन्यात उड्डाणपूल वाहतुकीस खुला करण्याचे नियोजन राष्ट्रीय महामार्ग प्राधिकरणाने केले होते. मात्र, पुन्हा एकदा काेरोनाचा फटका बसल्याने मे महिन्याचा मुहूर्त टळला.
दुसऱ्या लाटेतही उ्डाणपुलाच्या कामाला कोरोनाची बाधा झाली. मजूर संख्या घटली तर काही अभियंते बाधित झाल्याने कामकाजावर परिणाम झाला तरीही सुमारे दीडशे कामगारांवर काम सुरूच ठेवण्यात आले. कोरेाना नियमांचा कुठेही भंग होणार नाही अशा पद्धतीने कामकाजाचे नियोजन करण्यात आले असल्याचे महमार्ग प्राधिकरणाकडून सांगण्यात आले. यापूर्वी देण्यात आलेली मुदत संपुष्टात आली असली तरी थोडेच काम शिल्लक राहिल्याने पुढील महिन्यात पूल खुला करण्यात येणार आहे.
पुलाच्या कामकाजला अनेकदा कोरोनाच्या अडचणी आल्या असतानाही वाढीव मुदतीपेक्षा केवळ एक महिना उशिराने उड्डाणपुलाचे कामकाज पूर्ण करण्यासाठी यंत्रणा कामाला लागली आहे. कोरोनाच्या दुसऱ्या लाटेत काही मजूर तसेच अभियंते कोरोनाने प्रभावित झाल्याने तसेच काही मजूर कामावर हजर राहत नसल्याने कामकाजावर काहीसा परिणाम होण्याची शक्यता वर्तविली जात होती; परंतु सातत्यपूर्ण कामाच्या नियोजनातून कामकाज पूर्णत्वास येत आहे. अवघ्या काही दिवसांत येथील पुलाचे काम पूर्ण होऊन उड्डाणपूल खुला होणार आहे.
--कोट--
कोरोनाच्या दुसऱ्या लाटेचा कामगारांच्या उपस्थितीवर परिणाम झाला. कामगारांचा प्रश्न काही प्रमाणात निर्माण झाला असला तरी कामातील सातत्यामुळे काम पूर्णत्वास येत आहे. के.के. वाघ जवळील एक जॉईंट करण्याचे काम तेवढे शिल्लक असून येत्या काही दिवसांत ते पूर्ण होणार आहे. त्यामुळे पुढील महिन्यात उड्डाणपुलाचे काम पूर्ण होणार आहे.
- दिलीप पाटील, राष्ट्रीय राज्य महामार्ग प्राधीकरण, तांत्रिक प्रबंधक
((फोटो:१७ मे ९२ते९९)