------
हप्ता मागत भाजीविक्रेत्याला बळजबरीने लुटले
नाशिक रोड : पोलीस ठाण्यासमोरील अण्णा हजारे मार्गावर शनिवारी दुपारी एका युवकास दमदाटी करून, ‘तुला हप्ता द्यावा लागेल,’ असे सांगून दोघा गुंंडांनी युवकाच्या खिशातील चार हजार रुपये बळजबरीने काढून घेत जबरी चोरी केली. देवळालीगाव, मालधक्का येथील संजय हिरालाल जैन यांनी दिलेल्या फिर्यादीत म्हटले आहे की, त्यांचा पंचवटीतील मित्र फारुक चांद शेख हा भाजीपाला विक्रीचा व्यवसाय करतो. शनिवारी दुपारी पावणेचार वाजेच्या सुमारास जैन हे शेख यांना भेटायला गेले होते. तेथे दोघे लुटारू आले व त्यांनी जैन व शेख यांना धक्काबुकी करत हप्ता द्यावा लागेल,’ असे सांगून जैन यांच्या खिशातील चार हजार रुपये बळजबरीने काढून घेतले. याप्रकरणी नाशिक रोड पोलीस ठाण्यात संशयित सागर प्रकाश कांबळे व त्याच्या साथीदाराविरुद्ध जबरी चोरीचा गुन्हा दाखल करण्यात आला आहे.
---
मालधक्का रोडवर दोघांवर चाकूहल्ला
नाशिक रोड : देवळालीगाव मालधक्का रोड येथे जुन्या भांडणाची कुरापत काढत दोघा भावांवर चाकूने वार करून मुलाला लाथ्या-बुक्क्यांनी मारहाण करून जखमी केल्याची घटना घडली. मालधक्का रोड आम्रपालीनगर येथील भिकन अब्बास मन्सुरी याने दिलेल्या फिर्यादीत म्हटले आहे की, शनिवारी रात्री साडेआठच्या सुमारास संशयित सिद्धार्थ धनेधर, दर्शन भालेराव, बंटी पाटील, नीरज जाधव (सर्व रा. राजवाडा) हे मन्सुरींच्या घरी आले. मन्सुरी यांच्या मुलासोबत पाच-सहा महिन्यांपूर्वी झालेल्या भांडणाची कुरापत काढून भिकन व त्याचा भाऊ मुस्तफा यांच्या हातापायांवर चाकूने वार करून जखमी केले. भिकन यांचा मुलगा आतिक याला लाथा-बुक्क्यांनी मारहाण केली. यामुळे परिसरात दहशतीचे वातावरण पसरले आहे. याप्रकरणी नाशिक रोड पोलीस ठाण्यात हाणामारीचा गुन्हा दाखल करण्यात आला आहे.