भंगार बाजारात आगीच्या घटना

दहा बंब : गॅसकटरच्या वापरामुळे निमंत्रण; जीवित, वित्तहानी टळली

सिडको : मागील तीन दिवसांपासून भंगार बाजाराचे अतिक्रमण हटविण्याचे काम सुरू आहे. त्यामुळे सर्वत्र भंगारमालाचा व पत्र्यांचा खच पडलेला आहे. या खचमधून वस्तू काढताना गॅसकटरच्या साहाय्याने कापल्या जात आहेत. त्यामुळे ठिणग्या उडून प्लॅस्टिक व लाकडी फळ्यांनी पेट घेतल्याने आग लागली. दीड तासातच आगीवर पूर्णपणे नियंत्रण मिळविण्यात अग्निशामक दलाच्या जवानांना यश आले. अंबड-सातपूर लिंकरोडवर महापालिकेच्या वतीने कडेकोट पोलीस बंदोबस्तामध्ये अतिक्रमण हटविले जात आहे. सुमारे साडेचारशेहून अधिक भंगारमालाची गुदामे जमीनदोस्त करण्यात आल्याने संपूर्ण भंगारबाजार नष्ट झाला आहे. यामुळे सर्वत्र प्लॅस्टिक, पत्रे, लोखंडी गज, लाकडी फळ्यांचा खच पडला असून, या खचमधून व्यावसायिकांनी तातडीने वस्तू घेऊन जाव्यात, अशा सूचना महापालिकेने दिल्या आहेत. पत्त्यांच्या इमल्याप्रमाणे कोसळलेल्या भंगार मालाच्या गुदामांमध्ये दबलेल्या वस्तूंची शोधाशोध सुरू असून, यासाठी गॅस कटरमार्फत तुटलेले गज व शेडचे पत्रे कापले जात आहे. व्यावसायिकांकडून यासाठी घरगुती गॅस सिलिंडरचा वापर केला जात आहे. यामुळे ठिणग्या पडून आगी लागण्याच्या घटनांमध्ये वाढ होत आहे. अद्याप तीन वेळा भंगार बाजार भागात आगीच्या घटना घडल्या आहेत. सकाळी विराटनगर व दुपारी १२ वाजेनंतर अजमेरी चौकामध्ये दोन ठिकाणी प्लास्टिकच्या वस्तू व लाकडी फळ्यांनी पेट घेतला होता. आगीवर तत्काळ पाण्याचा मारा करून आग नियंत्रणात आणली गेली आहे. आग अचानकपणे लागली की लावण्यात आली याबाबत सत्यता अग्निशामक दलाकडून तपासली जात आहे. (वार्ताहर)