लोकमत न्यूज नेटवर्क मनमाड : येथील भर बाजारपेठेत पालिका कार्यालयासमोर असलेल्या तेजस लॉजच्या इमारतीला अचानक आग लागली. काही वेळातच आगीने रौद्र रूप धारण केल्याने परिसरातील नागरिकांमध्ये घबराट निर्माण झाली.आज दुपारनंतर तेजस लॉजच्या वरच्या मजल्यावरील बाल्कनीमधून धूर निघत असल्याचे परिसरातील नागरिकांच्या लक्षात आले. ही इमारत जुनी व लाकडी कौलरू असल्याने काही वेळातच आगीने रौद्र रूप धारण केले. आज रविवार बाजाराचा दिवस असल्याने बाजारपेठेत ग्राहकांची चांगलीच गर्दी होती. इमारतीला आग लागल्याचे समजताच नागरिकांची पळापळ झाली. पालिकेचे अग्निशमन पथक घटनास्थळी दाखल झाले. अरुंद रस्त्यामुळे आग आटोक्यात आणण्यासाठी अडचण निर्माण झाली होती. अथक प्रयत्नांनंतर आगीवर नियंत्रण आणण्यात यश मिळाले. दरम्यान ही आग शॉर्टसर्किटमुळे लागली असल्याचे सांगण्यात येते. या भागातील वीजपुरवठा अचानक उच्च दाबाने सुरू झाल्याने अनेकांच्या वीज उपकरणांचे नुकसान झाले.त्याच दरम्यान शॉर्टसर्किटने इमारतीला आग लागली असल्याचे या भागातील नागरिकांचे म्हणणे आहे.
मनमाड येथे इमारतीला आग
By admin | Updated: May 8, 2017 01:18 IST