डंपरची मोटारसायकलला धडक; भावाचा मृत्यू, बहीण जखमी

येवला तालुक्यातील रेंडाळे येथील वाल्मीक सोमनाथ लांडे (३२) व पाथरे येथील वर्षा बाळासाहेब सुडके (२४) हे दोघे मोटारसायकलवर होते. वर्षा हिचा विवाह असल्याने तिचा बस्ता उरकून तिला पाथरे येथे सोडण्यासाठी जात असताना समृद्धी महामार्गाच्या कामावरील डंपर चालकाने त्यांना धडक दिली. सिन्नर-शिर्डी मार्गावर हॉटेल पाहुणचारजवळ वावीकडून पालखी रोडकडे जात असणारा डंपर (क्रमांक एमपी ३९ एच २९०७) समृद्धी महामार्गाच्या मद्यपी चालकाला वळणाचा अंदाज न आल्याने त्याने अचानक मातीने भरलेला ट्रक वळविला. त्यात पाथरेकडे जाणारे मोटारसायकल (क्रमांक एमएच १५ डीडब्लू ३७१०) वरील बहीण, भाऊ अचानक ट्रकखाली आले. त्यात वाल्मीक लांडे याला जबर मार लागल्याने त्यास उपचारास घेऊन जात असतानाच त्याचा मृत्यू झाला तर बहीण वर्षा ही गंभीर जखमी झाली आहे. तिला उपचारासाठी सिन्नर येथील खासगी हॉस्पिटलमध्ये दाखल करण्यात आले आहे. या घटनेमुळे येवलासह पाथरे परिसरातून हळहळ व्यक्त करण्यात येत आहे. वावीचे सहायक पोलीस निरीक्षक सागर कोते यांच्या मार्गदर्शनाखाली हवालदार प्रकाश गवळी, दशरथ मोरे, भागवत कुरवडे, गोविंद सूर्यवाढ पुढील तपास करीत आहेत.