सिन्नर : पंचायत समितीच्या एकात्मिक बालविकास प्रकल्पाकडून अंगणवाडी सेविकांना देण्यात आलेले मोबाईल कमी क्षमतेचे असल्याने ते वारंवार नादुरुस्त होण्यासह त्यावर नवीन पोषण ट्रॅकर ॲप अपलोड होण्यासह अडचण येत असल्याने ऑनलाइन काम करणे अवघड झाल्याने संतप्त झालेल्या अंगणवाडी सेविकांनी आक्रमक पवित्रा घेत आंदोलन करून पंचायत समितीच्या बालविकास प्रकल्पात आपले ४२८ सदोष मोबाईल जमा करीत आंदोलन केले.
राज्य शासनाने २०१९ ला अंगणवाडी सेविकांना कामकाजासाठी दिलेले मोबाईल निकृष्ट दर्जाचे असून, ॲपही इंग्लिशमध्ये आहे. त्यावर काम करणे जिकिरीचे जाते. त्यामुळे शासनाने नवीन दर्जेदार मोबाईल द्यावे, मराठी ॲप विकसित करावे व मोबाईल दुरुस्तीचा खर्च प्रकल्प कार्यालयाने करावा, आदी मागण्यांसाठी अंगणवाडी सेविकांच्या वतीने आंदोलन करीत ४८० पैकी ४२८ अंगणवाडी सेविकांनी मोबाईल पंचायत समितीच्या एकात्मिक बाल विकास प्रकल्पात जमा केले.
संघटनेच्या जिल्हा उपाध्यक्ष राजश्री पानसरे, बीट प्रमुख सुरेखा शिंदे, सुशीला चव्हाणके, जीजा शिरसाठ, बेबी बोचरे, मीरा सोनवणे, इंदुमती पन्हाळे, आदींच्या नेतृत्वाखाली येथील पंचायत समितीच्या कार्यालयात आंदोलन करण्यात आले.
राज्य शासनाने दिलेले मोबाईल अतिशय निकृष्ट दर्जाचे असून, अंगणवाडी सेविकांना काम करताना कसरत करावी लागते. या मोबाईलची गॅरंटी नाही. त्यामुळे दुरुस्तीचा चार ते पाच हजारांचा खर्च त्यांना पदरमोड करून करावा लागतो. जर दुरुस्ती केली नाही तर अधिकाऱ्यांकडून कामावरून काढून टाकण्याची भाषा वापरली जाते. त्यामुळे नाइलाजाने दुुरुस्तीचा खर्च सोसून काम करण्याशिवाय पर्याय नसतो, असे जिल्हा उपाध्यक्ष राजश्री पानसरे यांनी सांगितले.
तालुक्यात ४८० मिनी अंगणवाडी सेविका व अंगणवाडी सेविका आहेत. त्यापैकी ४२८ सेविकांनी मोबाईल बॉक्समध्ये भरून पंचायत समितीच्या एकात्मिक बालविकास प्रकल्पात जमा केले आहेत. काही सेविकांची येण्या-जाण्याची सोय नसल्यामुळे त्यांना आंदोलनाला येता आले नाही. मात्र, त्याही लवकरच आपल्याकडील मोबाईल जमा करणार असल्याचे पानसरे म्हणाल्या.
चौकट...
राज्यभरात हे आंदोलन सुरू आहे. सोमवारी नाशिक जिल्ह्यात पंधरा तालुक्यांमध्ये हे आंदोलन करण्यात आले. तीन ते साडेतीन हजार मोबाईल प्रकल्पात जमा करण्यात आले. मोबाईल दर्जेदार हवेतच; पण महाराष्ट्रात काम करायचे आहे, मग ॲपदेखील मराठीत असायला हवे आणि दुरुस्तीचा खर्च प्रकल्पाने करावा, या आमच्या प्रमुख मागण्या आहेत.
- ब्रिजपालसिंह बादेल, राज्य सरचिटणीस.
(३१ सिन्नर)
सिन्नर पंचायत समितीच्या कार्यालयासमोर तालुक्यातील अंगणवाडी सेविकांनी आंदोलन करीत सामूहिकरीत्या मोबाईल पंचायत समितीच्या एकात्मिक बालविकास प्रकल्पाच्या कार्यालयात जमा करण्यात आले.
310821\31nsk_15_31082021_13.jpg
सिन्नर पंचायत समितीच्या कार्यालयासमोर तालुक्यातील अंगणवाडी सेविकांनी आंदोलन करीत सामुहिकरित्या मोबाईल पंचायत समितीच्या एकात्मिक बालविकास प्रकल्पाच्या कार्यालयात जमा करण्यात आले.