नाशिक : शुक्रवारी मध्यरात्रीपासून सुरू असलेल्या संततधार पावसाने शनिवारी (दि.२९) जोर धरला होता; मात्र दुपारी १२ वाजेपासून पावसाने उघडीप दिली. गंगापूर धरणाच्या पाणलोट क्षेत्रातही पावसाचा जोर कमी झाल्यामुळे विसर्गही कमी करण्यात आल्याने गोदावरीचा पूर ओसरला. रात्रीपासून शहरासह ग्रामीण भागात जोरदार पाऊस सुरू होता. सकाळीदेखील पावसाचा जोर कायम राहिल्यामुळे गोदावरीच्या पुराची तीव्रता वाढते की काय, अशी भीती नाशिककरांसह प्रशासनालाही वाटत होती; मात्र दहा वाजेपासून पावसाचा जोर कमी झाला आणि बारावाजेपर्यंत पावसाने उघडीप दिली. दिवसभर पावसाने विश्रांती घेतली होती. त्यामुळे गंगापूर धरणातूनही विसर्ग सकाळपासून ‘जैसे-थे’ ठेवण्यात आला होता. गोदावरीच्या पाण्याची पातळी कमी झाल्याने शांतपणे वाहणाºया गोदामाईसोबत ‘सेल्फी’ घेण्यासाठी संध्याकाळी तरुणाईची गोदाकाठावर गर्दी झाली होती. पावसाने उघडीप दिल्यामुळे शहरातील रस्त्यांवर दुपारपासून संध्याकाळपर्यंत नागरिकांची वर्दळ वाढल्याचे चित्र पहावयास मिळाले. बाजारपेठांमध्येही नागरिकांनी खरेदीसाठी गर्दी केली होती. त्यामुळे विक्रेत्यांनाही दिलासा मिळाला. नाशिककरांचे पारंपरिक पर्जन्यमापक मानल्या जाणाºया गोदापात्रातील दुतोंड्या मारुतीच्या कमरेपर्यंत पाण्याची पातळी संध्याकाळी ६ वाजेपर्यंत होती. पेठरोडवरील हवामान निरीक्षण केंद्राने दिवसभरात शहरात ९ मिलीमीटर पाऊस झाल्याची नोंद केली आहे.
दुपारनंतर उघडीप; पूर ओसरला
By लोकमत न्यूज नेटवर्क | Updated: July 30, 2017 01:18 IST