पोलिसांचे दररोज होणार पथ संचलन

पोलिसांचे दररोज होणार पथ संचलन

 मालेगाव : गणेशोत्सव काळात वरिष्ठ अधिकारी जाणून घेणार गणेश मंडळांच्या अडचणीमालेगाव : गणेशोत्सव व बकरी ईद सणाच्या पार्श्वभूमीवर येथील पोलीस यंत्रणा कमालीची सर्तक झाली आहे. गणेश चतुर्थीच्या दिवशी वरिष्ठ अधिकाऱ्यांसह कॅम्प पोलीस ठाण्याच्या अधिकारी व कर्मचाऱ्यांनी कॅम्प भागात बुलेट फेरी काढली होती. शहरात कुठलीही अनुचित घटना घडू नये यासाठी पोलीस मंगळवारपासून दररोज सायंकाळी शहरात पथ संचलन करणार आहेत.सध्या शहरात गणेशोत्सवाची धामधूम सुरू आहे. या पार्श्वभूमीवर कायदा-सुव्यवस्था टिकून रहावी यासाठी व गणेशभक्तांच्या समस्या जाणून घेण्यासाठी अपर पोलीस अधीक्षक राकेश ओला यांनी दररोज सायंकाळी अधिकाऱ्यांसह पायी फिरण्याचा निर्णय घेतला आहे. या पथ संचलनामध्ये त्यांच्या समवेत पोलीस उपअधीक्षक गजानन राजमाने, हगवणे सर्व पोलीस ठाण्यांचे प्रभारी अधिकारी उपस्थित राहणार आहेत. अपर पोलीस अधीक्षक ओला यांनी रमजान पर्व काळात शहराच्या पूर्वभागात दररोज सायंकाळी संचलन करून नागरिकांच्या समस्या जाणून घेतल्या होत्या. याचा फायदा पोलीस प्रशासनाला झाला होता. गत अनुभव लक्षात घेता पोलिसांनी गणेशोत्सव काळात विशिष्ट भागात वरिष्ठ अधिकाऱ्यांसह दाखल होऊन त्या भागातील समस्या जाणून घेण्याचा निर्णय घेतला आहे. या संचलनादरम्यान विविध मंडळांच्या अध्यक्ष, उपाध्यक्ष व पदाधिकाऱ्यांची भेट घेऊन त्या भागातील समस्या व उत्सव काळात पुरविल्या जाणाऱ्या सोयसुविधांविषयी चर्चा करण्यात येणार आहे. याबरोबरच शहरात कायदा व सुव्यवस्था कशी टिकून राहील याबाबत सूचना केल्या जाणार आहेत. पोलिसांनी सध्या नाकाबंदी, प्रतिबंधात्मक कारवाया करण्यात येत आहेत. तसेच शहर शांततेला बाधा पोहोचविणाऱ्यांवर तडीपारीच्या कारवाईचा प्रस्ताव सादर करण्यात आला आहे. तसेच गुंडांवर प्रतिबंधात्मक कारवाई केली जात आहे. शहरातील चौकाचौकात पोलीस बंदोबस्त तैनात करण्यात आला आहे. शहराच्या पूर्व व पश्चिम भागात उत्सव व सणकाळात पोलीस विशेष लक्ष ठेवून असल्याचे दिसून येत आहेत. (प्रतिनिधी)