नांदूरशिंगोटे : सकाळी रस्त्यावर गर्दी करून गप्पा मारत उभी असलेली ग्रामीण भागातील माणसे कडक निर्बंधांच्या काळात दिसेनाशी झाल्याने आपापसातला जणू संवादच हरवल्याची स्थिती झाली असल्याचे सध्या दिसत आहे. एरव्ही सकाळी ७ वाजताच गावातून जाणाऱ्या रस्त्याच्या दुतर्फा घोळक्याने उभे असलेले गावकरी आता दिसत नाहीत.
रस्त्याच्या कडेला दांडीच्या पातेल्यात उकळी फुटलेल्या चहाच्या वाफा नाहीत, की त्याचा दरवळ नाही. कढईत उकळणाऱ्या तेलातल्या वड्यांचा व भज्यांचा सुर्र आवाजही नाही आणि गावात घडलेल्या घटनांची चर्चाही नाही. ‘चल या गोष्टीवर’ चहा पाजतो असे हातावर टाळी देऊन दणक्यात आवाज देणारा वर्ग रस्त्यावरून गायब झाला आहे. त्यामुळे चहा पाजणारे व त्यांच्याकडून चहा पिणारे कोणीच दिसत नाहीत. सकाळच्या गप्पाटप्पा व चहा, नाश्ता टपरीवर जाऊनच करायचा असा दिनक्रम असलेल्या मंडळींची संख्या ग्रामीण भागात मोठी असते. त्यामुळे सकाळी ७ वाजेपासूनच रस्ते गर्दीने जिवंत होतात. कोरोना काळातील निर्बंधामुळे गावाकडचे रस्ते जणू ‘मुके’ झाल्याचा अनुभव सध्या येत आहे. नेहमी गर्दीतून वाट काढताना हॉर्न वाजवताना दिसणाऱ्या दुचाकी गाड्या व चारचाकी वाहने आता रस्त्यावर चिटपाखरू नसल्याने भरधाव वेगाने जाताना दिसत आहेत.
-----------------------
गावामधील वर्दळ थंडावली
कोरोनाच्या वाढत्या प्रादुर्भावामुळे घरात बसून घुसमटत आहेत. संवादाने कट्टी घेतली आहे. केव्हा हा कोरोना संपतो आणि सगळे सुरळीत होते याकडे सर्वांचे लक्ष लागले आहे. नाशिक-पुणे रस्त्यावरचे नांदूरशिंगोटे, दोडी, माळवाडी, गोंदेफाटा, करहे फाटा असो की, नांदूरशिंगोटे मधून जाणारा लोणी, तळेगाव, कोल्हार रस्ता किंवा वावीमार्गे कोपरगाव, येवला रस्ता असो यांच्यासह ग्रामीण भागातील आणि या भागातील गावामधील वर्दळ सध्या तरी चिडीचूप झाली आहे.