नाशिक: जिल्ह्यातील ग्रामीण भागात कोरोनाचा वाढता प्रसार रोखण्यासाठी संशयित रुग्णांच्या संपर्कात आलेल्या लोकांची अँटिजेंन चाचणी करण्याचा धडक उपक्रम जिल्हा परिषदेच्या आरोग्य विभागाने हाती घेतलेला असला तरी तपासणीसाठी गावोगावी जात असलेल्या वैद्यकीय पथकाला काही ठिकाणी लोकांच्या रोषास सामोरे जावे लागल्याच्या घटना घडू लागल्या आहेत. कळवण तालुक्यातील जयदर व तिरहाळे येथे वैद्यकीय पथकावर दगडफेक करून पिटाळून लावले तर तपासणीची सक्ती केल्यास प्राथमिक आरोग्य केंद्राचा पाणी पुरवठा तोडण्याचा इशारा देण्यात आला. या प्रकाराने पथक भयभीत झाले असून, पोलिसांना याची खबर देण्यात आली आहे.
कळवण तालुक्यातील जयदर येथे कोरोना संशयित रुग्ण सापडल्यामुळे वैद्यकीय पथक सोमवारी गावात गेले. ज्याठिकाणी रुग्ण आढळून आला तेथे कॉंटोंमेंट झोन जाहीर करून, रुग्णाच्या सानिध्यात आलेल्या लोकांची अँटिजेंन चाचणी करण्याचा प्रयत्न सुरू करताच काही लोकांनी एकत्र येत पथकावर दगडफेक करण्याचा प्रयत्न केला, काही दगड घेऊन पथकाच्या पाठीमागे धावले, ज्या ठिकाणी कॉंटोंमेंट झोनचे फलक लावले ते देखील फाडून फेकण्यात आले. गावात पाय ठेवल्यास तुम्हाला झोडपून तुमच्याच आरोग्य केंद्रात दाखल करू अशी धमकी दिल्यामुळे वैद्यकीय पथक हवालदील झाले. या वेळी गावचे सरपंच व ग्रामसेवकाने समजूत घालण्याचा प्रयत्न केला असता त्यांनाही धमकी देण्यात आली. परिणामी पथक माघारी फिरले. या घटनेची खबर गट विकास अधिकाऱ्यांना देण्यात येऊन पोलिसांना कळविण्यात आले.
अशाच प्रकार तालुक्यातील तिरहाळे येथे देखील घडला. वैद्यकीय पथक गावात तपासणीसाठी आल्याचे कळताच गावातील लोक एकत्र आले व त्यांनी पथकाला घेराव घालून तुम्ही मुद्दाम त्रास देण्यासाठी गावात आल्याचा आरोप करून, आम्हाला काहीच झालेले नसताना चुकीच्या पद्धतीने कोरोना पॉझीटीव्ह दाखवतात असे सांगून गावातून निघून जा, अन्यथा प्राथमिक आरोग्य केंद्राचे वीज, पाणी पुरवठा तोडण्याचा इशारा दिल्याने वैद्यकीय पथक माघारी फिरले. या दोन्ही घटनांनी कोरोनाशी दोन हात करण्यास तयार असलेल्या वैद्यकीय पथक घाबरले असून, आरोग्य कर्मचारी एकटेदुकटे गावात जाण्यास नकार देत आहेत