तालुक्यातील विविध ग्रामपंचायतीचे कामकाज तसेच पंचायत समितीच्या वेगवेगळ्या विभागाच्या कामकाजाचे मूल्यमापन करण्यासाठी पंचायतराज समिती सिन्नर तालुक्याच्या दौऱ्यावर आली होती. या समितीत अध्यक्ष आमदार संजय रायमुलकर, आमदार महादेव जानकर, आमदार सदाभाऊ खोत, आमदार दिलीप बनकर यांचा समावेश होता. पंचायत समितीत घेतलेल्या आढावा बैठकीस उपसचिव आठवले, जिल्हा परिषदेच्या मुख्य कार्यकारी अधिकारी लीना बनसोड, जिल्हा आरोग्य अधिकारी कपिल आहेर, प्रतिवेदक विठ्ठल खर्चे, गटविकास अधिकारी मधुकर मुरकुटे उपस्थित होते. दीड तास पंचायत समितीत आरोग्य, शिक्षण, ग्रामपंचायत, कृषी, इवद, पशू संवर्धन अशा सुमारे ११ विभागांचा आढावा घेण्यात आला. मुख्य अधिकाऱ्यांसह गटविकास अधिकाऱ्यांसोबत चर्चा करण्यात आली. या बैठकीत एकूण २८ प्रश्नापैकी २२ प्रश्नांवर चर्चा करण्यात आली. तथपि, समितीकडून तालुक्यातील विविध गावांत जाऊन तेथील ग्रामपंचायतींचे मूल्यमापन करणे टाळण्यात आले. सिन्नर पंचायत समिती पुरताच हा दौरा मर्यादित असल्याचे चित्र दिसून आले. पंचायत समितीतील बैठक आटोपल्यानंतर बारागावपिंप्री, के. पा. नगर येथे सत्कार स्वीकारून समिती निफाडकडे रवाना झाली. समितीकडून पंचायत समिती व ग्रामपंचायतींच्या कामकाजाचे मूल्यमापन केले जाते त्यामुळे ही समिती येणार म्हटल्यावर सर्वच विभागाचे अधिकारी व कर्मचारी चांगलेच धास्तावले दिसून येत होते. कामकाजात त्रुटी राह नयेत यासाठी सर्वांनी आधीच काळजी घेतल्याचे दिसून आले. पंचायत समितीच्या सभापती रोहिणी कांगणे यांच्यासह सदस्य जगन्नाथ भाबड, रवींद्र पगार, बाबासाहेब कांदळकर यांनी समिती सदस्य आमदारांची भेट घेऊन चर्चा केली. सभापती कांगणे यांनी विकासकामे करण्यासाठी आता अनेक ठिकाणी ग्रामपंचायतीच्या जागा शिल्लक नसल्याचे समितीला निदर्शनास आणून दिले.
चौकट-
मुख्यालयात राहण्याबाबत चर्चा
पंचायतराज समितीने घरकूल आढावा, विविध कामकाजे, आरोग्य शिक्षण याबाबत चर्चा केली. ग्रामसेवक व शिक्षकांनी मुख्यालयी राहण्याबाबत समितीचा आग्रह दिसून आला. प्रशासकीय कामाची माहिती घेतांना लोकांचे प्रश्न लवकर सोडविण्यासाठी प्रयत्न करण्याचे आवाहन केले. लोकांना चकरा मारायला लावू नका, वेळेत कामे करा अशा सूचना त्यांनी प्रशासनाला दिल्या.
चौकट-
माळेगाव ग्रामपंचायतीचे कौतुक
पंचायतराज समितीच्या सदस्यांनी माळेगाव ग्रामपंचायतीला भेट देऊन विविध विकासकामे व उपक्रमांची माहिती घेतली. ग्रामपंचायतीची सुसज्ज इमारत, विविध सुविधा, शाळा, मोफत वायफाय, सुकन्या योजना, महिलांसाठी मोफत विमा, मोफत ऑनलाईन दाखले, सोलर वॉटर हिटर अशा विविध उपक्रमांची पाहणी करीत कौतुक केले. यावेळी सरपंच प्रिया सांगळे, उपसरपंच रामदास सांगळे, ग्रामविकास अधिकारी कैलास वाघचौरे यांच्यासह सर्व ग्रामपंचायत सदस्य व कर्मचारी उपस्थित होते.
फोटो- २७ सिन्नर पंचायतराज
सिन्नर पंचायत समितीच्या आढावा बैठकीत बोलताना पंचायतराज समितीचे अध्यक्ष आमदार संजय रायमुलकर. समवेत महादेव जानकर, सदाभाऊ खोत, दिलीप बनकर, लीना बनसोड, मधुकर मुरकुटे यांच्यासह अधिकारी.
270821\27nsk_33_27082021_13.jpg
फोटो- २७ सिन्नर पंचायतराज सिन्नर पंचायत समितीच्या आढावा बैठकीत बोलतांना पंचायत राज समितीचे अध्यक्ष आमदार संजय रायमुलकर. समवेत महादेव जानकर, सदाभाऊ खोत, दिलीप बनकर, लीना बनसोड, मधुकर मुरकुटे यांच्यासह अधिकारी.