पोलीस दलाचे संचलन

नाशिकरोड : तणावाच्या पार्श्वभूमीवर खबरदारी; पवन पवारसह चौघांवर गुन्हा

नाशिकरोड : परिसरात गेल्या चार दिवसांपासून निर्माण झालेल्या तणावग्रस्त परिस्थितीच्या पार्श्वभूमीवर पोलिसांनी सशस्त्र संचलन सुरू केले आहे. जमावबंदी आदेश असतानाही नगरसेवक पवन पवार व त्याचे साथीदारांनी आदेशाचा भंग केल्याप्रकरणी पोलिसांनी त्यांना ताब्यात घेतले आहे. दरम्यान, जेलरोड येथे दगडफेक करणाऱ्या जमावाला पांगविण्यासाठी पोलिसांना लाठीमार करावा लागला. घटनेनंतर जेलरोड परिसरातील दुकानदारांनी आपापली दुकाने बंद केली. त्यामुळे काही काळ तणावसदृश परिस्थिती निर्माण झाली होती. बुधवारी सकाळी शहरातून पोलिसांचा मोठा फौजफाटा संचलन करीत उपनगर चौफुलीवर दुपारी एक वाजेच्या सुमारास आला. पोलीस उपायुक्त श्रीकांत धिवरे, सहायक पोलीस आयुक्त अतुल झेंडे, सचिन गोरे, मोहन ठाकुर, बजबळे, शालीग्राम पाटील, वरिष्ठ पोलीस निरीक्षक अशोक भगत, संजय देशमुख, नारायण न्याहळदे, देवराज बोरस्ते, हनुमंत गाडे आदिंसह सहायक पोलीस निरीक्षक, उपनिरीक्षक, राइट कन्ट्रोल फोर्स, राज्य राखीव दलाच्या तुकड्या, कमांडो पथक, पोलीस कर्मचारी, महिला पोलीस असा मोठा फौजफाटा कॅनॉलरोडने वाहनांमधून संचलन करत जेलरोड देशमुख भवन पर्यंत आला. तेथून पोलिसांचे संचलन जेलरोड शिवाजी पुतळा, राजराजेश्वरी मंगल कार्यालयाच्या दिशेने निघाले. पोलिसांची सतर्कताराजराजेश्वरीकडून पोलिसांचे संचलन मॉडेल कॉलनी रस्त्यावरून शिवाजीनगरमध्ये आले. यावेळी नगरसेवक पवन पवार यांच्या कार्यालयाशेजारी काही कार्यकर्ते बसलेले होते. यावेळी पोलीस अधिकाऱ्यांनी शहरात जमावबंदी आदेश लागू असल्याने निघून जाण्याबाबत सांगितले असता त्यावरून वाद निर्माण झाल्याने कार्यकर्त्यांकडून प्रतिकार सुरू झाल्याने पोलिसांनी लाठीमार केला. पोलिसांच्या लाठीमारमध्ये नगरसेवक पवन पवारसह त्याचा भाऊ विशाल व इतर साथीदारही सुटले नाही. लाठीमारमध्ये जखमी झालेल्या पवार बंधूंवर बिटको रुग्णालयात प्राथमिक उपचार करून जिल्हा रूग्णालयात नेण्यात आले. पोलिसांनी कायदा-सुव्यवस्था अबाधित ठेवण्यासाठी खाकीचा हिसका दाखविण्यास सुरुवात केल्याने काही मिनीटांतच जेलरोड परिसरातील दुकाने बंद होऊन अघोषित संचारबंदीसारखी परिस्थिती निर्माण झाली. शिवाजीनगर येथून पोलिसांचे संचलन जेलरोड, मध्यवर्ती कारागृहासमोरून भीमनगर, ब्रम्हगिरी सोसायटी, बेला डिसुझा रोडवरून के.एन. केला शाळा चौफुलीवर आले. यावेळी पोलिसांनी काही जणांना लाठ्यांचा प्रसाद देत पिटाळून लावले. यावेळी युवक व महिलांनी एकत्र येऊन घोषणाबाजी करण्यास सुरूवात केल्याने काही काळ तणाव निर्माण झाला. पोलिसांनी जमावाची समजूत काढल्यानंतर जमाव पांगला. त्यानंतर पोलिसांनी देवळालीगांव राजवाडा येथेही संचलन केले. राजवाड्यातून पोलिसांनी विहितगाव बागुलनगरपर्यंत संचलन केले. (प्रतिनिधी)