घोटी : प्रतिष्ठेच्या समजल्या जाणाऱ्या इगतपुरी तालुक्यातील मुकणे येथील ग्रामपंचायतीच्या सरपंच व उपसरपंचपदासाठी शुक्रवारी झालेल्या निवडणुकीत सरपंचपदी चंद्रभागाबाई प्रकाश साबळे यांची बिनविरोध निवड झाली. उपसरपंचपदी दीपाली मदन चोरडिया यांची निवड करण्यात आली. शिवसेनाप्रणीत किसान सेनेचे तालुकाप्रमुख मदन चोरिडया यांच्यासह बाजार समितीचे माजी सभापती गणपत राव, माजी सरपंच विष्णू राव यांच्या नेतृत्वाखालील अष्टविनायक पॅनलने आठ जागा मिळवून निर्विवाद बहुमत प्राप्त केले आहे. राजकीयदृष्ट्या प्रतिष्ठेच्या समजल्या जाणाऱ्या या ग्रामपंचायतीच्या सरपंच - उपसरपंचपदाची शुक्रवारी निवड घेण्यात आली. सरपंचपद अनुसूचित जमाती महिलासाठी आरक्षित असल्याने चंद्रभागाबाई प्रकाश साबळे यांचा एकमेव अर्ज दाखल झाला. यामुळे त्यांची बिनविरोध निवड करण्यात आली तर उपसरपंचपदासाठी निवड प्रक्रिया गुप्तमतदानाने घेण्यात आली. उपसरपंचपदासाठी कु. दीपाली मदन चोरडिया, प्रभाकर आवारी व सविता राव यांनी उमेदवारी अर्ज दाखल केले. यात माघारीच्या प्रक्रि येत सविता राव यांनी माघार घेतल्याने दीपाली चोरडिया व प्रभाकर आवारी यांच्यात लढत झाली. यात दीपाली चोरडिया हीस आठ मते पडली तर प्रभाकर आवारी यांना अवघ्या तीन मतांवर समाधान मानावे लागले. यामुळे कु. दीपाली चोरडिया यांची उपसरपंचपदी निवड करण्यात आली. अध्यासी अधिकारी म्हणून पी. एन. बिबवे यांनी काम पाहिले. त्यांना ग्रामसेवक उत्तम शेटे यांनी सहकार्य केले. या विशेष बैठकीस ग्रामपंचायत सदस्य हिरामण राव, चंद्रभागा राव, प्रभाकर आवारी, मंदा बोराडे, योगीता बोराडे, भास्कर राव, सविता राव, किशोर उबाळे काळू मुकणे आदि उपस्थित होते. दरम्यान ही निवड जाहीर होताच अष्टविनायक पॅनल समर्थकांनी गुलाल उधळून फटाक्याच्या आतषबाजीने आनंदोत्सव साजरा केला तसेच नवनियुक्त पदाधिकाऱ्याचा सत्कार करण्यात आला. यावेळी किसन सेनाप्रमुख मदन चोरडिया यांच्यासह माजी सभापती गणपत राव, माजी सरपंच विष्णू राव, प्रकाश साबळे, शांताराम उबाळे, पोपट राव, भगवान वेल्हाळ, राजाभाऊ राव, मोहन बोराडे, नीलेश चोरडिया, शांताराम उबाळे, किशोर साबळे, रवि साबळे आदि उपस्थित होते.
मुकणेच्या सरपंचपदी चंद्रभागा साबळे बिनविरोध : उपसरपंचपदी दीपाली चोरडिया
By admin | Updated: August 9, 2014 00:48 IST