इच्छुक उमेदवार देणार मतदारांना ‘गोडवा’

बचत गटांना रोजगार : तिळगूळ, लाडू, हलव्याची लाखो पाकिटे झाली भेट देण्यासाठी तयार

 नाशिक : येऊ घातलेली निवडणूक आणि मकरसंक्रांतीचे औचित्य साधून मतदारराजाचे तोंड गोड करावे, या हेतूने शहरातील हजारो इच्छुक उमेदवारांनी बचत गटांकडून मोठ्या प्रमाणात तिळगुळाचे पॅकेट्स बनवून घेतले आहेत. त्यामुळे यंदा मतदारांना मधुमेह होईपर्यंत प्रत्येक उमेदवाराच्या तिळगुळाचा आस्वाद घ्यावा लागणार असल्याचे चित्र आहे. शहरातील बचत गटांना मागील महिन्यातच तिळगुळाची मोठी आॅर्डर देण्यात आली असून, पंधरा दिवसांपासून बचत गटातील महिलांनी आॅर्डर पूर्ण करून इच्छुक मतदारांच्या घरी त्या पोहोचत्या केल्या आहेत. एकेका उमेदवाराने दहा हजार, पाच हजार तिळगुळाच्या पॅकेट्सची आॅर्डर दिली. त्या प्रत्येकी एका प्लॅस्टिक पाऊचमध्ये एक तिळगुळाचा लाडू, थोडा हलवा टाकून पाऊच बंद केल्यावर पाऊचला उमेदवाराचे ओळखपत्र व मकरसंक्रांतीच्या शुभेच्छा देणारे छोटेसे शुभेच्छापत्र स्टॅपल करण्यात आले आहे. शुभेच्छापत्रावर इच्छुक उमेदवाराचा फोटो, ओळख, आश्वासने व मतदान करण्याचे आवाहन, असा मजकूर आहे. या पाऊच व्यतिरिक्त काही उमेदवारांनी २५ ते ५० किलो तिळगुळाचे लाडू, हलवा यांच्या स्वतंत्र आॅर्डर्सही दिल्या आहेत. एकेका बचत गटात १२ ते १५ महिलांचा समावेश असून, बचत गटाच्या महिलांनी तिळगूळ, लाडू, हलव्याची लाखो पाकिटे पंधरा दिवसांत तयार केली आहेत. बचत गटांना मिळालेल्या या कामामुळे नोटाबंदीच्या अडचणीच्या काळात मोठा दिलासा मिळाल्याची भावना व्यक्त केली जात आहे. निवडणूक कार्यक्रम जाहीर झाल्यानंतर बचत गटांना इतरही कामे मिळण्याची प्रतीक्षा आहे. (प्रतिनिधी)