धाडसी मुलीची शिक्षणाची ओढ

धाडसी मुलीची शिक्षणाची ओढ

 पंचवटी -शाळा म्हटली की, अनेक विद्यार्थ्यांच्या पोटात खड्डा पडतो; मात्र याच शाळेसाठी बारा वर्षांची चिमुकली चक्क परभणीहून नाशिकला एकटी रेल्वेने दाखल झाल्याची घटना पंचवटीत घडली. या धाडसी मुलीची शिक्षणाची ओढ अनेकांना बरेच काही ‘शिकवून’ गेली. सोनाली माणिक निरवळ हिची ही गोष्ट. तिचे आई-वडील अत्यंत हलाखीच्या परिस्थितीत मोलमजुरी करतात. सोनालीला आणखी दोन बहिणी. पंचवटीतील फुलेनगरच्या महापालिका शाळा क्रमांक ६७ मध्ये या तिघी शिकत होत्या. सोनाली व मोना या दोघी चौथीत, लहान बहीण राणी दुसरीत शिकत होती. सोनाली अभ्यासात अत्यंत हुशार; मात्र आठवडाभरापूर्वीच वडिलांची तब्येत बिघडल्याने हे कुटुंब आपले मूळ गाव असलेल्या परभणीतील सेवकनगर येथे निघून गेले. तेथे दोन-तीन दिवसांनी सोनालीला शाळेची आठवण येऊ लागली. तिने अर्धा तास पायपीट करून रेल्वेस्थानक गाठले. रेल्वेने ती नाशिकला पोहोचली. या लांबच्या प्रवासात एकाने सोनालीला पाहून ‘तू कोठे चालली?’ अशी विचारणा केली. तेव्हा सोनालीने ‘नाशिकला शाळेत चालल्याचे’ सांगितले. त्यावर त्याने तिला पंधरा रुपये दिले. सोनालीने हे पैसे खर्च केले नाहीत. नाशिकरोडला उतरल्यावर तिने पंचवटी बस पकडली अन् मैत्रिणीच्या घरचा रस्ता धरला.सोनाली अचानक दिसेनाशी झाल्यावर तिच्या कुटुंबीयांनी शोध सुरू केला. शेजारी राहणाऱ्या मुलाने तिने नाशिकला जाण्याची माहिती विचारल्याचे सांगितले. त्यावर सोनालीच्या आईने नाशिकला तिच्या शिक्षकांना ही बाब फोनवरून कळविल्यावर शिक्षकांनी शोधाशोध सुरू केली. सोनाली सुखरूप मिळाल्याने सर्वांचाच जीव भांड्यात पडला. सोनालीची आई मीरा यांनी तातडीने नाशिक गाठले अन् सोनालीला कवटाळले या क्षणाने उपस्थितही गहिवरले. सोनालीला शाळा व परिसर विकास समितीने रोख ३ हजार रुपयांची मदत केली. पहिलीपासून मनपाच्या शाळेत शिक्षण घेणाऱ्या सोनालीला शाळेची ओढ लागली होती. (वार्ताहर)