नाशिक : सदस्य नोंदणीच्या संख्येत चीनला मागे टाकण्यासाठी भाजपाने कंबर कसली असताना आता स्थानिक स्तरावर सदस्य नोंदणीचे उद्दिष्ट पूर्ण करण्यासाठी प्रयत्नांची पराकाष्ठा करण्यात येत आहे. त्यामुळे सुलभ पद्धतीने सदस्य नोंदणी व्हावी यासाठी राजू कोरडे या कार्यकर्त्याने शक्कल लढविली असून, भाजपाचे सदस्यत्व स्वीकारल्यास आपल्या दुकानात कटिंग फ्री करण्याची तयारी दर्शविली आहे. देशात आणि राज्यात भाजपा सत्तेवर आल्यानंतर आता सभासद नोंदणीत नवा विक्रम करण्याची तयारी सुरू केली आहे. चीनमध्ये सत्ताधिकारी पक्षाचे आठ कोटी सदस्य आहेत. हा गिनीज बुकमध्ये विक्रम आहे. तो मोडून भाजपाचे दहा कोटी पक्ष सदस्य करण्याचा आणि विक्रम नोंदविण्यासाठी हे उद्दिष्ट देण्यात आले आहे. स्थानिक पातळीवरही सदस्य नोंदणीसाठी सदस्य नोंदणीसाठी आटापिटा सुरू आहे. त्यामुळे गंगापूर नाक्यावर केशकर्तनाचा व्यवसाय करणाऱ्या राजू कोरडे यांनी अजब शक्कल लढविली आहे. भाजपाचे प्रदेशाध्यक्ष रावसाहेब दानवे यांच्या वाढदिवसाचे औचित्य साधून १८ ते ३१ मार्चदरम्यान सदस्य होण्याची आॅफर नागरिकांना दिली असून, जे कोणी पक्षाचे सदस्य होतील, त्यांची ‘कटिंग फ्री’ अशी अभिनव कल्पना दिली आहे. जे भाजपाचे हितचिंतक जास्तीत सदस्य करतील त्यांच्यासाठीही पॅकेज दिले जाणार आहे. पाच सभासद करणाऱ्यांसह तर ९ वेळा हेअर कट मोफत, २५ सभासद केले तर ९ वेळा फेस मसाज मोफत, ५० सभासद मिळाले तर ९ वेळा हेअर कलर आणि १०० सभासद केले तर ९ वेळा फेशियल मोफत अशाप्रकारे पॅकेज देण्यात आले आहे. (प्रतिनिधी)
मधमाशांच्या भितीने पळताना मुलगा ठार
By admin | Updated: March 29, 2015 00:52 IST