लोकमत न्यूज नेटवर्क
इंदिरानगर : शहर व परिसरात कोरोनाचा प्रादुर्भाव पुन्हा वाढत आहे. या पार्श्वभूमीवर इंदिरानगर पोलीस ठाण्यातर्फे परिसरात धडक मोहीम राबवून गेल्या मार्च महिन्यात मास्क न लावता सर्रास फिरणाऱ्या ४५९ लोकांवर कारवाई करण्यात आली. या कारवाईतून एकूण १ लाख ४५ हजार २०० रुपयांचा दंड वसूल करण्यात आला. तसेच नियमांचे उल्लंघन करणाऱ्या २ दुकानांवरही कारवाई करण्यात येऊन मालकांना प्रत्येकी ५ हजारांचा दंड ठोठावण्यात आला.
महापालिकेकडून कोरोनाची साखळी तोडण्यासाठी नियमांंचे पालन करावे, अशी वारंवार सूचना नागरिकांना देण्यात येत आहे. तरीही काही व्यावसायिकांकडून आणि नागरिकांकडून नियमांचे उल्लंघन होत असल्याने इंदिरानगर पोलीस ठाण्याने मार्च महिन्यात कलानगर चौक, पाथर्डी फाटा व पाथर्डी गाव चौफुलीसह परिसरातील मुख्य व अंतर्गत रस्त्यांवर मास्क न वापरणाऱ्या ४५९ बेजबाबदार नागरिकांवर दंडात्मक कारवाई केली.
शनिवार व रविवारी जीवनावश्यक सेवा वगळता इतर सर्व आस्थापना बंद ठेवण्याचे प्रशासनाचे आदेश असतानाही शनिवारी (दि. ३) सकाळी दहा ते अकराच्या दरम्यान दोन आस्थापना सुरू असल्याने या दुकानदारांना प्रत्येकी पाच हजारप्रमाणे एकूण दहा हजारांचा दंड करण्यात आला.