वासाळी शिवारात महिलेचा निर्घृण खून

वासाळी शिवारात महिलेचा निर्घृण खून

सातपूर : वासाळी शिवारातील काराचे डोंगराच्या पायथ्याशी सोमवारी (दि़ १९) सायंकाळच्या सुमारास मृतदेह आढळून आलेल्या महिलेचा खून करण्यात आल्याचे वैद्यकीय अहवालानंतर उघड झाले आहे़ या प्रकरणी सातपूर पोलीस ठाण्यात अज्ञात व्यक्तिविरोधात खुनाचा गुन्हा दाखल करण्यात आला आहे़ या महिलेचा खून केल्यानंतर पुरावा नष्ट करण्यासाठी मृतदेह जाळण्याचा प्रयत्न करण्यात आल्याचे समोर आले आहे़  पोलिसांनी दिलेल्या माहितीनुसार वासाळी शिवारातील कारच्या डोंगराच्या पायथ्याशी असलेल्या ४१ गटनंबरच्या शेतात एका अज्ञात महिलेचा अर्धवट जळालेला मृतदेह आढळल्याची माहिती मिळाली होती़ त्यानुसार पोलिसांनी पाहणी केल्यानंतर या महिलेवर धारदार शस्त्राने वार तसेच डोक्यात दगड मारल्याच्या खुणा होत्या़ तसेच या महिलेचा मृतदेह जाळण्याचा प्रयत्न केल्याचे दिसून आल्याने मृतदेह शवविच्छेदनासाठी जिल्हा रुग्णालयात पाठविण्यात येऊन अकस्मात मृत्यूची नोंद करण्यात आली होती़ जिल्हा रुग्णालयातील वैद्यकीय अधिकाऱ्यांनी या महिलेचा खून झाल्याचा अहवाल दिल्याने या प्रकरणी खुनाचा गुन्हा दाखल करण्यात आला आहे़ दरम्यान, या महिलेची अद्याप ओळख पटलेली नसून, पोलीस हवालदार शशिकांत देवरे यांनी सातपूर पोलीस ठाण्यात फिर्याद दिली आहे़