स्थायीसाठी भाजपाचे मनसेपुढे लोटांगण

स्थायीसाठी भाजपाचे मनसेपुढे लोटांगणो

नाशिक : स्थायी समिती सभापतिपदासाठी भारतीय जनता पक्ष महाराष्ट्र नवनिर्माण नेपुढे लोटांगण घालत असल्याची शिवसेनेकडून जोरदार टीका केली जात आहे. तसेच भाजपाने आपली राष्ट्रीय पक्षाची इभ्रत जपावी, असा सल्लाही सेनेकडून दिला जात असल्याने सभापतिपदावरून राजकीय वातावरण तापले आहे. स्थायी समिती सभापतिपदाचा निर्णय सोमवारी (दि.३०) होणार असला तरी एकाही पक्षाने आपली भूमिका जाहीर न केल्याने सभापतिपदासाठीची चुरस वाढली आहे. त्यातच भाजपा आणि मनसेमध्ये झालेल्या अलिखित कराराचा मनसेला विसर पडल्याचा आरोप भाजपा नेत्यांकडून केला जात असल्याने मनसे-भाजपा युतीत तेढ निर्माण होण्याची शक्यता आहे. करारानुसार सत्तेतील पाच वर्षांत पहिल्या व दुसऱ्या वर्षी मनसेला व त्यानंतर भाजपाला सभापतिपद दिले जावे, असे ठरले होते. त्यानुसार भाजपाने सभापतिपदाचा रेटा लावून धरला आहे. मात्र मनसेसह शिवसेना, कॉँग्रेस-राष्ट्रवादी कॉँग्रेस व अपक्ष यांनीही सभापतिपदाचे अर्ज दाखल केल्याने मनसे-भाजपामध्येच तेढ निर्माण झाले आहे. सभापतिपदाचा वाढत असलेला गुंता लक्षात घेऊन दोन्ही पक्षांनी पक्षश्रेष्ठींकडे धाव घेतली असून, भाजपाचे आमदार गिरीश महाजन व मनसेचे आमदार बाळा नांदगावकर यांच्यात सभापतिपदाबाबत चर्चा झाली. परंतु त्यातही भाजपाने आपली भूमिका कायम ठेवल्याने चुरस निर्माण झाली आहे. दरम्यान, या,सर्व घडामोडीत शिवसेनेने भाजपाला लक्ष केले असून, भाजपाला राष्ट्रीय पक्षाचा दर्जा असताना मनसेसारख्या पक्षापुढे लोटांगण घालणे ही बाब न पटणारी असल्याची टीका स्थानिक शिवसेना नेत्यांकडून केली जात असल्याने येत्या विधानसभा निवडणुकीत महायुतीत सर्व काही आलबेल असेलच, असे म्हणणे चुकीचे ठरेल. दरम्यान, भाजपाने स्थानिक पदाधिकाऱ्यांनी विरोधकांच्या हालचालीवर लक्ष केंद्रित केले असून, मनसेच्या पाठिंब्यासाठी स्थानिक मनसे नेत्यांची मनधरणी केली जात आहे. त्यातच कॉँग्रेस, राष्ट्रवादी कॉँग्रेसनेही अर्ज भरल्याने चुरस निर्माण झाली आहे. (प्रतिनिधी)