येवला : येवला दौऱ्यावर आलेल्या पालकमंत्री छगन भुजबळ यांची सर्वपक्षीय नगरसेवकांनी भेट घेऊन विविध मागण्यांचे निवेदन सादर केले. यावेळी पालिकेतील रिक्त पदे तातडीने भरण्याबाबत भुजबळ यांना साकडे घालण्यात आले.
उपनगराध्यक्ष सूरज पटणी यांच्या नेतृत्वाखाली सर्वपक्षीय नगरसेवकांनी पालकमंत्री भुजबळ यांच्याशी चर्चा केली. प्रारंभी येवला शहराला पाणीपुरवठा करणारा साठवण तलाव पालखेड आवर्तनाने टंचाईच्या पार्श्‍वभूमीवर भरून दिल्याबद्दल भुजबळ यांचा पालिकेच्या वतीने सत्कार करण्यात आला.
मागील वर्षापासून बदली झालेल्या संगणक अभियंता, विद्युत अभियंता, स्वच्छता अभियंता व नगर परिषद जलदाय, अग्निशमन, रचनाकार विभागातील श्रेणी अ, ब, क मिळून एकूण १६ पदे अद्याप रिक्त असून इतर विभागातील कर्मचाऱ्यांवर पालिकेच्या कामकाजाचा बोजा पडत आहे. त्यामुळे शहर विकासास अडचण येत असल्याने सदर पदे तातडीने भरण्याची मागणी सदर निवेदनात करण्यात आली आहे. पालकमंत्री भुजबळ यांनी याबाबत पुढील कार्यवाहीच्या सूचना संबंधितांना दिल्या.
याप्रसंगी राष्ट्रवादी काँग्रेस गटनेते प्रवीण बनकर, अपक्ष गटनेते रूपेश लोणारी, संतोष परदेशी, मलिक शेख, शिवसेना गटनेते दयानंद जावळे, शफिक शेख, अमजद शेख, निसार लिंबूवाले, सरोजिनी वखारे, छाया देसाई आदींसह नगरसेवक उपस्थित होते.
फोटो- ०२ येवला पालिका
येवला येथील पालिकेच्या रिक्त पदांबाबत छगन भुजबळ यांच्याशी चर्चा करताना सर्वपक्षीय नगरसेवक.
020721\02nsk_36_02072021_13.jpg
फोटो- ०२ येवला पालिका येवला येथील पालिकेच्या रिक्त पदांबाबत छगन भुजबळ यांचेशी चर्चा करताना सर्वपक्षीय नगरसेवक.