सिन्नर येथे उद्यापासून भैरवनाथ महाराज यात्रोत्सव

सिन्नर : येथील श्री भैरवनाथ महाराजांच्या दोन दिवसीय यात्रोत्सवास दमनक चतुर्दशीपासून सोमवारी (दि. १०) प्रारंभ होत आहे.

सिन्नर : येथील ग्रामदैवत व परिसरात जागृत देवस्थान म्हणून ख्याती असलेल्या श्री भैरवनाथ महाराजांच्या दोन दिवसीय यात्रोत्सवास दमनक चतुर्दशीपासून सोमवारी (दि. १०) प्रारंभ होत आहे. समितीच्या वतीने यात्रेची तयारी पूर्ण झाली आहे. या निमित्ताने विविध धार्मिक व मनोरंजनात्मक कार्यक्रमांचे आयोजन करण्यात आले आहे. सोमवारी भल्या पहाटेपासून रथ व कावडी सवाद्य मिरवणूक होणार आहे. सकाळी सहा वाजता त्र्यंबकबाबा भगत यांच्या हस्ते रथपूजन करण्यात येऊन मिरवणुकीस ढोल-ताशा व टाळ-मृदंगाच्या गजरात सुरुवात होणार असून गंगावेस, लालचौक, महालक्ष्मी रोड, खडकपुरामार्गे शहराच्या जवळपास सर्वच रस्त्यावरुन रथोत्सव व गंगाजलांच्या कावडींची मिरवणूक काढण्यात येणार आहे. रथ मिरवणुकीपुढे त्र्यंबकबाबा यांच्या मार्गदर्शनाखाली वारकरी भजनी मंडळाची दिंडी काढण्यात येणार आहे. सकाळी सहाला सुरू झालेली मिरवणूक रात्री उशिरापर्यंत सुरू असते. शहरातील पाचोरे कुटुंबीयांकडे रथ हाकण्याचा मान असतो. रथाच्या दोन्ही बाजूने भालदार चोपदार उभे राहून देवाच्या मूर्तीस चौराने वारा घालतात. रथाला बैलजोड्या जुंपण्यासाठी शेतकऱ्यांमध्ये चढाओढ असते. बैलांना पोळा सणाप्रमाणे स्वच्छ धुवून व सजवून मिरवणूक मार्गावर सज्ज ठेवतात. रथामागे सहभागी झालेल्या कावडीधारकांच्या स्वागतासाठी पाट मांडण्यात येऊन त्यावर त्यांचे पाय धुवून पूजन करण्याची प्रथा आहे. तसेच कावडीधारकांना गूळ-खोबरे, पेढे, साखरफुटाणे देण्यात येतात. संपूर्ण गावापासून सूर्यास्तापर्यंत भैरवनाथ पटांगणात येते. याठिकाणी कावडीधारकांच्या उत्साहाला उधाण आलेले असते.कावडीतील गोदावरीच्या पाण्याने भैरवनाथ मूर्तीस अभिषेक घातला जातो. मंदिराभोवती दिव्यांची रोषणाई करण्यात येते. मुला-मुलींसाठी खेळणी व मिठाईची दूकाने थाटण्यास प्रारंभ झाला आहे. यात्रा म्हणजे सिन्नरकर नातेवाईक व मित्रमंडळींना वर्षातून एकदा भेटण्यासाठीचा योग जुळवणारे जणू संमेलनच असते. घरोघरी आलेले पाहुणे आणि मित्रांच्या स्रेहभेटींनी या यात्रेला वेगळेच परिमाण लाभले. त्यास लाभलेल्या भक्तीच्या कोंदणात सिन्नरनगरीतले रस्ते रांगोळ्यांनी सजले जातात. विविध स्वयंसेवी संस्था व सामाजिक मंडळांकडून कावडी धारकांसाठी अल्पोपहार, सरबताची व्यवस्था करण्यात येते. रथामागे असलेल्या कावडीधारकांचे पदप्रक्षालन व प्रसाद वाटपासाठी मोठी गर्दी होते. कावडीधारकांना ओल्या नारळाचे खोबरे, गुळ, पेढे प्रसाद म्हणून देण्यात येतो. रथामागे कावडी घेऊन पायी चालणाऱ्या कावडीधारकांना भाविकांकडून सरबत तसेच प्रसादाचे वाटप केले जाते. सकाळी सहाच्या सुमारास सुरु झालेली रथ मिरवणूक दिवसभर शहरातील सर्वच रस्त्यांवरुन मार्गक्रमण करीत सायंकाळी मंदिराच्या प्रांगणात रथ मिरवणूकीची सांगता झाल्यावर सायंकाळी मंदिराच्या प्रांगणात मोठी यात्रा भरते. यावेळी भैरवनाथ महाराजांच्या दर्शनासाठी व श्रीफळ वाढविण्यासाठी भाविकांची मोठी गर्दी होते. सोमवारी रात्री ९ वाजता शोभेच्या दारुची आतषबाजी होणार आहे. त्यानंतर रात्री मुंबईच्या कलावंतांचा मनोरंजनाचा कार्यक्रम होणार आहे. मंदिराच्या प्रांगणात भाविकांच्या मनोरंजनासाठी शोभेच्या दारुची आतषबाजी करण्यात येते. त्यानंतर भरलेल्या यात्रेत भाविक व ग्राहकांची खरेदीसाठी गर्दी होते. यात्रोत्सवात परिसरातील अनेक गावांतील भाविक, कावडीधारक मोठ्या संख्येने सहभागी होतात. यात्रेत मेवा-मिठाई, खेळणीच्या दुकानांतून मोठी आर्थिक उलाढाल होते. मंगळवारी (दि. ११) म्हणजे यात्रेच्या दिवशी कुस्त्यांची दंगल होणार आहे. बारादारी येथे सायंकाळी ५ वाजता राज्यभरातील नामवंत मल्ल हजेरी लावणार आहेत. (वार्ताहर)