इन्स्टाग्रामवर तरुणासोबतची मैत्री भोवली

एका अल्पवयीन मुलीला इन्स्टाग्रामवर मैत्री करण्यास भाग पाडत २७ वर्षाच्या तरुणाने प्रेमाचा बनाव करून आपापसांतील संवाद आणि संबंध वाढविले. संशयित प्रियकराच्या भेटीसाठी त्याच्या घरी गेलेल्या अल्पवयीन मुलीवर तरुणाने बलात्कार केला. असुरक्षित शारीरिक संबंध ठेवल्यामुळे मुलगी गर्भवती झाल्यानंतर हा सगळा प्रकार उघडकीस आला. पीडित मुलीने सातपूर पोलीस ठाण्यात दिलेल्या तक्रारीवरून पोलिसांनी संशयित प्रियकर सुनील गोदीराम ठाकरे (रा. श्रमिकनगर) यास अटक केली आहे. संशयित सुनील आणि अल्पवयीन मुलीची मैत्री इन्स्टाग्रामवर झाली होती. त्याने तिच्याशी ओळख वाढवली. मैत्री केल्यानंतर त्याने मागील आठवड्यात तिला स्वतःच्या घरी भेटण्यास बोलाविले. प्रेमाच्या जाळ्यात अडकवत तिच्यावर बलात्कार केल्याचे फिर्यादीत म्हटले आहे. संशयित सुनील ठाकरे यास पोलिसांनी अटक केली असून, त्याच्यावर बालकांचे लैंगिक अत्याचारापासून संरक्षण कायद्यानुसार (पोस्को) तसेच बलात्काराचा गुन्हा दाखल केला आहे.