नाशिक : समाजातील आत्महत्या रोखण्यासाठी सायकल फेरी तसेच प्रत्येक सदस्याच्या खिडकीत दिवा लावून आयएमए नाशिक आणि नाशिक मानसोपचारतज्ज्ञ संघटनेतर्फे प्रबोधनासाठी अनोख्या उपक्रमाचा प्रारंभ यंदाच्या वर्षापासून करण्यात आला.
आत्महत्या ही एक जागतिक समस्या असून दिवसेंदिवस त्यात वाढ होताना दिसत आहे. या समस्येकडे जगाचे लक्ष वेधण्यासाठी व जनजागृती करण्यासाठी जागतिक आरोग्य संघटनेच्या वतीने १० सप्टेंबर हा दिवस दरवर्षी ‘जागतिक आत्महत्या प्रतिबंध दिन’ म्हणून साजरा केला जातो.
पूर्ण जगात दरवर्षी ८ लाख आत्महत्या होतात, म्हणजेच प्रत्येक ४० सेकंदाला जगात कोणीतरी आयुष्य संपवते आहे. त्यापेक्षा २० पट जास्त लोक आत्महत्येचा प्रयत्न करतात. म्हणून आत्महत्या ही एक मोठी सामाजिक समस्या असून आत्महत्या प्रतिबंध ही प्रत्येकाची जबाबदारी असल्याचे आयएमए अध्यक्ष डॉ. हेमंत सोननीस यांनी सांगितले. आत्महत्या थोपविण्यासाठी डॉक्टर आणि मानसोपचारतज्ज्ञ यांच्या बरोबर समाजातील सर्व घटकांनी प्रयत्न केले पाहिजे असे आयएमएचे अध्यक्ष डॉ. हेमंत सोननीस यांनी सांगितले. नाशिक सायक्लिस्ट फाउंडेशनचे अध्यक्ष राजेंद्र वानखेडे आणि डॉ. मनीषा रौंदळ यांच्यासह डॉ. स्वाती चव्हाण, डॉ. जयंत ढाके, डॉ. नीलेश जेजुरकर, डॉ. अनूप भारती आदींसह अन्य पदाधिकारी उपस्थित होते.