----
नाशिक : एकलहरा गेट, निर्मल सोसायटी येथे मित्रास सोडविण्यास आलेल्या युवकाला व इतर तिघांना टोळक्याने मारहाण करुन चाकूने वार करुन जखमी केले.
जेलरोड पंचक एसबी प्लाझा इमारतीत राहणारे अशोक बबन रांधवन यांनी दिलेल्या फिर्यादीत म्हटले आहे की, शुक्रवारी रात्री कारमधून मित्र हरिष पाटील याला निर्मल सोसायटी येथे सोडविण्यास गेलो होतो. त्यावेळी तेथे दहा ते पंधरा जण रंगपंचमी खेळत होते. रांधवन गाडीतून उतरले असता संजय दिलिप जाधव रा. ट्रॅक्शनजवळ यांच्याकडे येऊन तू येथे कसा आला, नेहमी का येतो, तू ताबडतोब निघून जा, असे म्हणून त्याने शिवीगाळ सुरु केली. जाधवसह सुधीर पगारे, संदीप बागूल, अजय बागूल, सागर सोनवणे, विशाल सोनवणे, राहुल म्हस्के, अक्षय म्हस्के व त्यांचे तीन-चार साथीदार यांनी रांधवन यांना शिवीगाळ करुन लाथा बुक्क्यांनी मारहाण केली. संजय जाधवने चाकूसारख्या हत्याराने हाताच्या दंडावर वार करुन जखमी केले. यावेळी मित्र हरिष पाटील व समाधन बोराळे हे मदतीस आले असता त्यांनाही मारहाण करुन जखमी केले. बोराळेच्या पाठीवर चाकूने वार केले. अचानक झालेल्या हल्ल्यामुळे रांधवन, पाटील, बोराळे पळून गेले. दीड तासानंतर राहुल राजेंद्र साठे, शंकर मल्लेश बाली हे निर्मल सोसायटी येथून जात असताना काही कारण नसताना या संशयितांनी त्यांनाही मारहाण करुन वार करुन जखमी केले. याप्रकरणी नाशिकरोड पोलिस ठाण्यात गुन्हा दाखल करण्यात आला आहे.