नाशिक : महाराष्ट्र राज्य तंत्रशिक्षण संचालनालयातर्फे दहावीनंतर प्रथम वर्ष अभियांत्रिकी व तंत्रज्ञान पदविका प्रवेशासाठी पहिल्या फेरीसाठी शनिवारी (दि. १८ ) जागावाटप जाहीर करण्यात येणार आहे. त्यानुसार प्रवेशाची संधी मिळालेल्या विद्यार्थ्यांना १९ ते २३ सप्टेंबर या कालावधीत संबंधित महाविद्यालयात मूळ कागदपत्रांसह उपस्थित राहून प्रवेश निश्चित करण्याच्या सूचना संचालनालयातर्फे करण्यात आल्या आहेत.
शैक्षणिक वर्ष २०२१-२२ मधील दहावीनंतर प्रथम वर्ष अभियांत्रिकी व तंत्रज्ञान पदविका अभ्यासक्रम प्रवेशप्रक्रियेअंतर्गत ७ सप्टेंबरपर्यंत विद्यार्थ्यांकडून मागविण्यात आलेल्या अर्जांवरील प्रक्रियेनंतर आता पुढील प्रवेशप्रक्रियेचे वेळापत्रक जाहीर करण्यात आले आहे. त्यानुसार गुरुवारी (दि. ९) तात्पुरती गुणवत्ता यादी जाहीर करण्यात आली असून, अंतिम गुणवत्ता यादी १३ सप्टेंबरला जाहीर होणार आहे. त्याचप्रमाणे पहिल्या फेरीसाठी उपलब्ध असलेल्या प्रवर्गनिहाय जागाही सोमवारीच (दि. १३) प्रदर्शित करण्यात येणार असून, कॅपराउंड एकसाठी १३ ते १६ सप्टेंबर या कालावधीत ऑप्शन फॉर्म उमेदवाराच्या लॉगईनमधून भरता येणार आहे. त्यानंतर शनिवारी (दि. १८) पहिल्या फेरीसाठी जागावाटप प्रदर्शित करण्यात आल्यानंतर १९ ते २२ सप्टेंबरदरम्यान वाटप झालेल्या जागेवर विद्यार्थ्यांना त्यांच्या लॉगईनद्वारे स्वीकृती नोंदवावी लागणार आहे. तसेच प्रवेशाची संधी मिळालेल्या जागेवर १९ ते २३ या कालावधीत मूळ कागदपत्रांसह उपस्थित राहून प्रवेश निश्चित करण्याच्या सूचना संचालनालयातर्फे करण्यात आल्या आहेत.