‘ज्ञानोबा माउली तुकाराम’चा शाळांमध्ये गजर

दिंडी : आषाढी एकादशीनिमित्त विविध सांस्कृतिक कार्यक्रम; विविध संतांची साकारली वेषभूषा

 नाशिक : शहरातील विविध शाळांमध्ये आषाढी एकादशीच्या पूर्व संध्येला दिंडी काढून विविध सांस्कृतिक कार्यक्रम सादर करण्यात आले. याप्रसंगी विद्यार्थ्यांनी विठ्ठल-रुक्मिणी आणि वारकऱ्यांच्या वेशभूषेत ‘ज्ञानोबा माउली तुकाराम’चा गजर केला.अभिनव बालविकास मंदिर व आदर्श शिशुविहार शाळेत मविप्र सरचिटणीस नीलिमा पवार यांच्या उपस्थितीत आषाढी एकादशीनिमित्त वृक्षदिंडीचा कार्यक्र म भक्तिमय वातावरणात पार पडला. याप्रसंगी नानासाहेब महाले, सी. डी. शिंदे, हरिश्चंद्र मोराडे, सचिन ठोके, रावसाहेब शिंदे, योगेश निकम, विजया बच्छाव, मुख्याध्यापक मीनाक्षी गायधनी, वैशाली देवरे यांच्या हस्ते प्रतिमापूजन व पालखीचे पूजन झाले. उपस्थित मान्यवरांचे स्वागत तुळशीचे रोप, पुस्तक व गुलाबपुष्प देऊन करण्यात आले.नीलिमा पवार यांनी मनोगतात अभ्यासाबरोबर इतर कलागुणांना वाव देण्यासंदर्भात मार्गदर्शन करून आकर्षक वेशभूषेत आलेल्या चिमुकल्यांचे कौतुक केले. अभिनव व आदर्श शिशुविहारमधील चिमुकल्यांनी रिंगण करून टाळ-मृदंगाच्या गजरात नृत्य केले. शाळेतील चिमुकल्यांनी वृक्षसंवर्धन विषयक घोषणा देत मविप्र संस्थेच्या आवारातून वृक्षदिंडी आणली. याप्रसंगी प्रतिभा बोऱ्हाडे, योती पवार आदिंसह शिक्षक, विद्यार्थी उपस्थित होते.