हवाई प्रयोगाचा ड्रोन जमिनीवर !

नाशिक : करायचे तर काही तरी हटकेच. मग रस्त्यावर पडलेल्या व उघड्या डोळ्याने दिसणाऱ्या खड्ड्यांचे उपग्रहाद्वारे मोजमाप असो की, अदृश्य स्वरूपात थैमान घालणाऱ्या कोरोना विषाणूवर हवाईमार्गे हायड्रोक्लोराईड औषधाची फवारणी असो. आता हवाईमार्गे औषध फवारणी म्हटल्यावर आकाशात घिरट्या घालणारे हेलिकॉप्टर किंवा विमान डोळ्यापुढे आल्याशिवाय राहणार नाही. परंतु, नाशकातील गल्लीबोळात औषधाचा शिडकावा करण्यासाठी हवाई आयुधे उपयोगी पडणार नसल्याचे पाहून खासदार हेमंत गोडसे यांनी ड्रोनद्वारे हा उपक्रम राबविण्याचा निर्णय घेऊन त्याचा वाजतगाजत शुभारंभही केला. शहरातील सर्वच गल्लीबोळांतून थैमान घालणाऱ्या विषाणूचा आता नायनाट होणारच, या आनंदात समस्त गुलशनाबादकर लॉकडाऊनमुळे घरात बंदिस्त असतानाही नाचले. थेट परराज्यातील तंत्रज्ञांकडून कोरोना विषाणूचा बंदोबस्त करण्यासाठी गोडसे यांनी मागवलेल्या नवीन फार्म्युल्याचे नुसते कौतुकच झाले नाही तर गेल्या वर्षभरापासून कोरोना रूग्णांची न थकता सेवा करणाऱ्या समस्त डॉक्टर, परिचारिकांनीदेखील सुटकेचा नि:श्वास सोडला. मंत्री, सचिवांच्या बैठकांमध्ये तासनतास बसून राहणाऱ्या शासकीय अधिकारी व कर्मचाऱ्यांनी मनोमन गोडसे यांचे आभार मानले. कोरोनावर मात करण्यासाठी जालीम अशाप्रकारचा नवीन फॉर्म्युला आजवर आपल्याला कसा सुचला नाही, म्हणून गोडसे यांच्या स्वपक्षातील तसेच महाविकास आघाडीतील मंत्र्यांनाही प्रश्न पडला. शहरी भागातच कोरोनावर जालीम उपाय करायचा आणि ग्रामीण भागाला खुदाच्या भरोसे सोडून देण्याच्या गोडसे यांच्या पक्षपातीपणाबद्दल सिन्नर, इगतपुरीच्या मतदारांमधून काहीशी नाराजीही व्यक्त करण्यात आली. परंतु, दोनवेळा मतदारांनी लोकसभेत पाठविल्यामुळे कायमच ‘हवेतील प्रयोगा’वर विश्वास ठेवून असलेल्या गोडसे यांनी त्याकडे दुर्लक्ष केले. ग्रामीण भागापेक्षा नाशिककरांना कोरोनापासून मुक्ती देण्याचा चंग बांधून त्यांनी उडवलेला ड्रोन मात्र अवघ्या काही मिनिटातच जमिनीवर आला. गोडसे यांचे स्वप्न भंग झाले तसेच समस्त गुलशनाबादकरही हळहळले. तांत्रिक कारणामुळे हवाईमार्गे नाशिकरांना कोरोनामुक्त करण्याचा प्रयोग आधुनिक सामग्री व विषयातील तज्ज्ञांचे मार्गदर्शक घेऊनही अयशस्वी ठरल्याने जमिनीवर आलेल्या गोडसे यांनी आता ग्रामीण भागातील ट्रॅक्टरचा आधार घेतला. ट्रॅक्टरच्या सहाय्याने यापुढे शहरात औषध फवारणी करण्याचा त्यांनी नुसता मनसुबाच व्यक्त केला नाही तर त्याचाही वाजतगाजत शुभारंभ केला. त्यात आता फरक इतकाच की, जसे उपग्रहाद्वारे रस्त्यावरचे खड्डे मोजल्यानंतर त्याचे पुढे काय झाले, हे जसे समजू शकले नाही, तसेच हवाई असो वा जमिनीवरून करण्यात येत असलेल्या औषध फवारणीतून काय निष्पन्न झाले, याबाबत मात्र गोडसे यांना दोषी धरू नये.