नाशिक : लोकसेवा आयोगाचे केंद्र नाशिकला मंजूर झाल्यानंतर येत्या १० ऑक्टोबर रोजी नाशिकमध्ये प्रथमच परीक्षा होणार आहे. या परीक्षेच्या निमित्ताने आयोगाचे उपसचिव एस.के. गुप्ता यांनी परीक्षेच्या तयारीचा आढावा घेतला. आयोगाच्या मानांकनानुसार जिल्हा प्रशासनाने परीक्षेची तयारी केली असल्याचे जिल्हाधिकारी सूरज मांढरे यांनी सांगितले.
जिल्हाधिकारी कार्यालयात यासंदर्भातील आढावा बैठकीचे तसेच प्रशिक्षणाचे आयोजन करण्यात आले होते. नाशिक मध्ये पहिल्यांदाच केंद्रीय लोकसेवा आयोगाकडून सिव्हिल सर्विस पूर्व परीक्षा १० ऑक्टोबर रोजी होणार आहे. यासंदर्भातील प्रशिक्षणासाठी केंद्रीय लोकसेवा आयोगाकडून गुप्ता यांच्यासोबत अवर सचिव दीपक पंत,उज्ज्वल कुमार, निवासी उपजिल्हाधिकारी भागवत डोईफोडे, उपजिल्हाधिकारी नीलेश श्रींगी परीक्षा केंद्राचे प्राध्यापक हजर होते.
ऑक्टोबर २०२१ मध्ये होऊ घातलेल्या परीक्षेसाठी नाशिकमध्ये एकूण १२ केंद्रे निश्चित आली असून, साधारण ४ हजार ४०० इतक्या परीक्षार्थ्यांनी नाशिक केंद्र म्हणून पर्याय निवडलेला आहे. विशेष बाब म्हणजे परीक्षेसाठी दिव्यांग परीक्षार्थींसाठी स्वतंत्र व्यवस्था करण्याबद्दलचे निर्देश गुप्ता यांनी यावेळी दिले आहेत. आयोगाकडून दर्शविण्यात आलेल्या अपेक्षांबद्दल जिल्हाधिकारी मांढरे यांनी यंत्रणा सज्ज असल्याबद्दलची ग्वाही दिली.
निवासी उपजिल्हाधिकारी डोईफोडे यांनी यावेळी आभार मानले.
--इन्फो--
`१) जिल्ह्यातून १२ परीक्षा केंद्रांची निवड
२) ४ हजार ४०० विद्यार्थी देणार परीक्षा
३) दिव्यांग विद्यार्थ्यांसाठी असेल स्वतंत्र व्यवस्था