अज्ञात वाहनाच्या धडकेत तरुण ठार

पोलीस सूत्रानुसार, शहादा-मंदाणे राज्य मार्गावरील कर्जोत गावाजवळ वीटभट्टीनजीक एक तरुण रक्तबंबाळ होऊन मृतावस्थेत असल्याचे रविवारी सकाळी आढळून आल्याने एकच खळबळ उडाली. मयत तरुण हा भोंगरे, ता. शहादा येथील गणेश विजय अहिरे (२२) असल्याची ओळख पटली. गणेश हा एक महिन्यापासून नंदुरबार येथे कामाला होता. शनिवार, ११ सप्टेंबर रोजी सायंकाळी भोंगरे गावाकडे मेहुण्यांसोबत प्रकाशा गावापर्यंत आला. तेथून तो मेहुण्यांना परत पाठवून एकटाच गावाकडे निघाला. शहादा येथील गाडी मिळाली नसल्याने त्याने पायीच रस्ता धरला. मिळालेल्या माहितीनुसार, त्याने मंदाणे गावाकडे जाणाऱ्या वाहनांना हात देऊन थांबविण्याचा प्रयत्न केला. परंतु रात्र असल्याने कोणीही वाहन थांबविले नाही. गणेश हा रस्त्याने हात देत देत चालत राहिला. अशातच एका अज्ञात वाहनचालकाने बेजबाबदारपणे वाहन चालविल्याने रस्त्यावर पायी चालणाऱ्या गणेश अहिरे यास जोरदार धडक दिल्याने त्याचा जागीच मृत्यू झाला. धडक दिल्यानंतर वाहन चालक आपल्या वाहनासह पसार झाला. दुसऱ्या दिवशी रविवार, १२ सप्टेंबर रोजी सकाळी कर्जोत गावाजवळील वीटभट्टीजवळ कोणीतरी अज्ञात व्यक्तीचा अपघातात मृत्यू झाल्याची वार्ता परिसरात पसरली. या घटनेची माहिती गणेशच्या परिवाराला मिळाल्याने परिवारातील सदस्यांनी आपल्या नातेवाइकांसह घटनास्थळी धाव घेतली. मृत पावलेला आपलाच मुलगा असल्याची खात्री पटल्यानंतर या घटनेची फिर्याद मयत गणेशचे वडील विजय कथ्थू अहिरे (रा. भोंगरा) यांनी पोलिसांना दिली. त्यानुसार अज्ञात वाहन चालकाविरोधात शहादा पोलीस स्टेशनला गुन्हा दाखल करण्यात आला असून घटनेचा तपास सहायक पोलीस निरीक्षक गणेश पवार हे करीत आहे.