एक लाखाचा लाकूडसाठा जप्त

लोकमत न्यूज नेटवर्कनवापूर : नवापूर येथील वनक्षेत्रपाल व त्यांच्या पथकाने खरबर्डी गावातील एका घराची झडती घेऊन सुमारे एक लाख रुपयांचा लाकूड साठा जप्त केला.वनविभागाच्या सूत्रानुसार, वनक्षेत्रपाल प्रथमेश हाडपे यांना खरबर्डी गावात अवैधरित्या लाकूड व्यवसाय सुरु असल्याची गुप्त खबर मिळाली. त्यानुसार पथक तयार करुन प्रथमेश हाडपे व  सहकारी कर्मचारी यांनी खरबर्डी गावात धर्मा ठगण्या गावीत यांच्या घराची सर्चवॉरटने झडती  घेतली असता घराच्या मागे  पडसाळीत रंधामशीन व अवैध तोडीचे सागवान लाकडाची साईज आढळून आले. खरबर्डी गावातील अन्य ठिकाणी इलेश फुलजी गावीत यांच्या शेतातील पडसाळीची झडती घेतली असता त्या घरातही अवैध तोडीचे साग साईज आढळून आले. झडतीचा सुगावा लागल्याने इलेश फुलजी गावीत यांनी घरातील रंधामशीन गायब केले. दोन्ही ठिकाणचे  सागवानी लाकूड पंचनामा करुन वनविभागाने जप्त केले.  मुद्देमाल शासकीय जीपने वाहतूक करुन नवापूर येथील शासकीय काष्ठ आगारात जमा करण्यात आला. ही कारवाई उपवनसंरक्षक नंदुरबार, वनविभाग शहादा, विभागीय वनअधिकारी दक्षता विभाग धुळे, सहायक वनसंरक्षक नंदुरबार यांच्या मार्गदर्शनाखाली वनक्षेत्रपाल प्रथमेश हाडपे, वनपाल                      प्रकाश मावची, डी.के. जाधव, वनरक्षक सतीश पदमोर, संतोष गायकवाड, दीपक पाटील, संजय बडगुजर, कल्पेश अहिरे, कमलेश वसावे, माजी सैनिक रवींद्र कासे, चालक भगवान साळवे यांनी केली. पुढील तपास खेकडाचे वनपाल करीत आहेत.