ऑनलाईन लोकमत
तळोदा,दि.25- जन्मता:च नशीबी कुटुंबाचा आधार नसलेल्या रोनकला मातृपितृत्वाची माया देवून त्याचे आयुष्य एक आदिवासी गरीब दाम्पत्य फुलवित आहे. त्यांचा या आदर्श कार्यामुळे समाजातील हरवलेली माणुसकी अजूनही जीवंत असल्याचे दाखवून दिले आहे.
तळोदा शहरापासून चार किलो मीटर अंतरावर असलेलं दलेलपूर हे छोटसं गाव. संपूर्ण आदिवासी वस्ती असलेलं हे गाव याच गावात सुरेश गुंज्या पाडवी व बेबीबाई सुरेश पाडवी हे चाळीशीतील दाम्पत्य राहतात. भूमिहीन असलेलं हे दाम्पत्य मोल मजुरी करून आपला संसार चालवत आहेत. सन 2014 साली नेहमी प्रमाणे सकाळी सुरेश पाडवी हे बैल चारण्यासाठी गावापासून जवळ असलेल्या एका गव्हाच्या रिकाम्या शेतात गेले होते. त्याच वेळी बांधावर भरलेली एक पिशवी दिसली. ते पिशवी जवळ गेले असता त्यांना पिशवीत काही तरी हालचाल करित असल्याचे दिसले. ती पिशवी उघडताच त्यांना एका दिवसाचे अर्भक आढळले. हे अर्भक अक्षरश: रक्ताने माखलेलं होतं त्यांनी हा प्रकार गावाच्या पोलीस पाटलांना सांगितला. तसेच अर्भक त्यांच्या स्वाधीन देखील केले. या अर्भकाबाबत संपूर्ण गावात चौकशी केली. परंतु कोणीही हा प्रकार केला नसल्याचे निष्पन्न झाले. शेवटी तळोदा पोलीस ठाण्यात कळविण्यात आले. पोलिसांनी घटनास्थळी येवून पूर्ण चौकशी केली. पोलिसांनी पंचनामादेखील केला होता. त्यानंतर हे नवजात अर्भक स्वाधीन करण्याचा प्रश्न पोलिसांपुढे निर्माण झाला होता. मात्र या अर्भकाला सांभाळण्याचा निर्णय या आदिवासी दाम्पत्याने घेतला. पोलिसांनीही या बालकास पाळणाघरात न पाठवता सुरेश पाडवी यांच्या स्वाधीन केले. त्याबाबतची लिखापटी सुद्धा पोलिसांकडून लिहून घेण्यात आली. त्यानंतर पाडवी दाम्पत्याने या एका दिवसाचे अर्भकाचे मोठय़ा जिद्दीने संगोपन करत त्यास मोठ करीत आहे. हा बालक आता चार वर्षाचा झाला असून, तो सुदृढ आहे. पाडवी दाम्पत्याच्या या गौरवास्पद कार्यामुळे जन्मताच बेवारस असलेल्या रोनकला आई-वडील तर मिळालेच त्याचबरोबर त्याच्या आयुष्यात उजेड फुलला.