नंदुरबार : शहरात येणारा तांदळाचा ट्रक पोलिसांनी रविवारी पकडला असून, पोलीस ठाण्यात जमा करण्यात आला आहे. सोमवारी पुरवठा विभागाला पत्र देऊन चौकशी करून कारवाई केली जाणार असल्याचे शहर पोलिसांनी स्पष्ट केले. दरम्यान, तीन दिवसांपूर्वीही एक ट्रक जप्त करण्यात आला असून, त्याबाबतही अद्याप कारवाई झालेली नाही.
दोंडाईचाहून नंदुरबारकडे येणारा ट्रक (क्रमांक एम.एच.२० ईजी ९१४६) शहरातील कृषी महाविद्यालयाच्या गेटजवळ अडविण्यात आला. ट्रकची तपासणी केली असता, त्यात तांदूळ असल्याचे चालकाकडून सांगण्यात आले. यामुळे पोलिसांशी संपर्क साधून सदरचे वाहन शहर पोलीस ठाण्याच्या आवारात जमा करण्यात आले आहे. औरंगाबादकडून सदरचे वाहन गुजरात राज्यात जात होते, असे बोलले जात आहे. तीन दिवसांपूर्वीही वाहन (क्रमांक एमएच. २३ डब्ल्यू ५४८१) दोंडाईचाकडूनच नंदुरबारकडे येत असतांना कृषी महाविद्यालयाजवळच पकडण्यात आले होते. त्यात तांदळाच्या ६०० गोण्या आहेत. ते वाहनही शहर पोलिसात जमा आहे.
चार दिवसांत दोन वाहने जमा करण्यात आली असली, तरी गुन्हा दाखल झालेला नाही. सोमवारी शहर पोलिसांतर्फे पुरवठा विभागाला पत्र दिले जाणार असून, चौकशीनंतरच कारवाई केली जाणार असल्याचे शहर पोलिसांनी स्पष्ट केले.