तोरणमाळ येथे स्थानिक पर्यटकांची गर्दी वाढू लागल्याने कोरोना विषाणूचा संसर्ग वाढू लागला आहे. त्यामुळे तोरणमाळ हॉटस्पॉट बनू लागले असून, ग्रामपंचायतीने आठवडे बाजार बंद ठेवण्यासह शनिवार, रविवार तोरणमाळ बंद ठेवण्याचा निर्णय बैठकीत घेतला आहे.
जिल्ह्यात सध्या कोरोना रुग्णांची संख्या वाढत आहे. सुरुवातीला शहरी भागात मर्यादित असलेला हा संसर्ग आता ग्रामीण भागासह थेट दुर्गम- अतिदुर्गम भागातही पोहोचू लागल्याने त्याची भीती आदिवासी भागातही आता वाढली आहे. या पार्श्वभूमीवर तोरणमाळ ग्रामपंचायतीने अत्यावश्यक सेवा वगळता आठवडे बाजार बंद ठेवण्यासोबत शनिवार व रविवारी कडक लॉकडाऊन पाळण्याचा निर्णय घेतला आहे. तोरणमाळ हे निसर्गसौंदर्य स्थळ आहे. त्यामुळे पर्यटकांची मोठी गर्दी याठिकाणी होत असते. त्यामुळे अतिदुर्गम भागात कोरोनाचा संसर्ग मोठ्या प्रमाणावर वाढत असून, एकूण नऊ रुग्ण आढळल्याने भीतीचे वातावरण निर्माण झाले आहे.
तोरणमाळ ग्रामपंचायत तसेच म्हसावद पोलीस ठाण्यांतर्गत संयुक्त बैठक बोलवून शनिवार व रविवारी कडक लॉकडाऊनसह आठवडे बाजार बंदचा निर्णय घेण्यात आला. यावेळी तोरणमाळचे सरपंच मधुकर चौधरी, सीमा करणसिंग चौधरी, म्हसावद पोलीस ठाण्याचे पोलीस निरीक्षक निवृत्ती पवार, ग्रामसेवक डी.डी. पाटील, जीवन रावताळे, ग्रामपंचायत सदस्य, तोरणमाळ दूरक्षेत्राचे चंदू साबळे, दिलीप सूर्यवंशी, छोटूलाल पावरा आदी ग्रामस्थ उपस्थित होते.
भोगऱ्या उत्सव कोरोनामुळे रद्द
आदिवासी परंपरेनुसार आदिवासी बांधव भोगऱ्या हा उत्सव दिवाळी सणापेक्षा अधिक आनंदाने साजरा करतात. हा सर्वांत मोठा उत्सव मानला जातो. १५ दिवस हा उत्सव आठवडे बाजारात मोठ्या उत्साहाने साजरा करण्यात येतो. भोगऱ्या बाजारानिमित्ताने लाखो रुपयांची उलाढाल होत असते. आदिवासी तरुणाई मोठ्या जल्लोषाने परंपरा राखत हा उत्सव साजरा करतात. मात्र, यंदा कोरोनाचा वाढता प्रादुर्भाव पाहता प्रशासनानेदेखील गर्दी होऊ नये म्हणून काळजी घेण्याचे आवाहन केले आहे. तोरणमाळ ग्रामपंचायत प्रशासनाने दिलेल्या नियमानुसार बाजार बंद असल्याने भोगऱ्या, गुलाल्या उत्सव होणार नाहीत, असे तोरणमाळचे सरपंच मधुकर चौधरी यांनी सांगितले.