नंदुरबार : व्यापाऱ्याच्या डोळ्यात मिरचीपूड टाकून त्याच्याकडील एक लाख २२ हजार रुपये लुटल्याची घटना नंदुरबार-वेळावद रस्त्यावर गुजरभवाली गावाजवळ घडली. या घटनेमुळे परिसरात खळबळ उडाली आहे. नंदुरबार येथील व्यापारी नवलकिशोर जिवनमल राठी, रा.दत्त कॉलनी, नंदुरबार हे तालुक्यातील आडची, गुजरभवाली, वेलदा भागातील उधारी वसुल करून परत नंदुरबारकडे आपल्या मोटरसायकलीने (क्रमांक एमएच ३९-एच १२८८) येत होते. त्यांचा पाठलाग करणाऱ्या मोटरसायकलीवरील तिघांनी त्यांना गुजरभवाली फाट्याजवळ गाठले. राठी यांना काही कळण्याच्या आतच तिघांपैकी एकाने त्यांच्या डोळ्यात मिरचीपूड फेकली. त्यानंतर त्यांच्या मोटरसायकलच्या हॅण्डलला लावलेली बॅग हिसकवून चोरटे पसार झाले. बॅगेत वसुलीचे एक लाख २२ हजार रुपये होते. राठी यांनी तशा अवस्थेत गुजरभवाली गाठले, तसेच भ्रमणध्वनीवर आपल्या नातेवाईकांना ही बाब सांगितली. नवलकिशोर राठी यांच्या फिर्यादीवरून उपनगर पोलीस ठाण्यात गुन्हा दाखल करण्यात आला आहे. दरम्यान, रहदारीच्या भर रस्त्यावर जबरी चोरीची घटना घडल्याने परिसरात खळबळ उडाली आहे.
डोळ्यात मिरचीपूड फेकून सव्वालाख लंपास
By admin | Updated: October 20, 2016 18:12 IST