प्रतापपूर : कोरोनवर मात करायची असेल तर लसीकरणाशिवाय पर्याय नसून, ग्रामीण भागात लसीकरणाचे प्रमाण वाढविण्यासाठी सामूहिक प्रयत्न होणे गरजेचे आहे. यासाठी गावातील सरपंच, उपसरपंच तसेच पदाधिकारी यांनी स्वतः लसीकरण करून घ्यावे, जेणेकरून ग्रामस्थांच्या मनातील भीती दूर होईल व ग्रामस्थांकडून लसीकरणाला चांगला प्रतिसाद मिळेल, असा विश्वास जिल्हा परिषद अध्यक्ष सीमा वळवी यांनी प्रतापपूर येथे प्राथमिक आरोग्य केंद्राच्या भेटी दरम्यान व्यक्त केला.
तळोदा तालुक्यातील प्रतापपूर येथील प्राथमिक आरोग्य केंद्राला जिल्हा परिषद अध्यक्षा सीमा वळवी यांनी भेट देऊन वैद्यकीय अधिकारी, कर्मचारी तसेच लसीकरणासाठी आलेल्या नागरिकांशी संवाद साधून परिस्थितीचा आढावा घेतला. या वेळी काँग्रेसचे तालुकाध्यक्ष रोहिदास पाडवी, पोलीस पाटील बबन इंद्रजित, ग्रामपंचायत सदस्य सुरेश इंद्रजित, वैद्यकीय अधिकारी योसेफ गावीत, राहुल पावरा, मनोज इंद्रजित, राजेंद्र गिरासे, उपस्थित होते. या वेळी वैद्यकीय अधिकारी डॉ.योसेफ गावीत यांनी प्राथमिक आरोग्य केंद्रांतर्गत लसीकरणाचे प्रमाण वाढण्यासाठी केंद्रातील कर्मचारीवर्ग, अंगणवाडी सेविका, आशा कार्यकर्त्या कंबर कसून कामाला लागले असल्याचे सांगितले. तसेच जिल्हा परिषद शाळेच्या शिक्षक वर्गाकडूनही मोठ्या प्रमाणावर गावागावातून जनजागृती होत आहे. त्यामुळे लसीकरणाच्या टक्केवारीत वाढ होत असल्याचे सांगितले. या वेळी जिल्हा परिषद अध्यक्षा वळवी यांनी प्रतापपूर केंद्राच्या पूर्णत्वास येणाऱ्या इमारतीच्या कामाची पाहणी केली. याप्रसंगी लसीकरणासाठी तालुका वैद्यकीय अधिकारी डॉ.महेंद्र चव्हाण यांच्या मार्गदर्शनाखाली वैद्यकीय अधिकारी डॉ.राकेश पावरा, डॉ.योसेफ गावीत, आरोग्य सेवक एस.बी. जाधव ,आरोग्यसेविका वर्षा पाडवी, सपना वळवी, तसेच जिल्हा परिषद शाळेच्या मुख्याध्यापिका वर्षा ठाकूर, अंगणवाडी सेविका, आशा गटप्रवर्तक व आशा कार्यकर्त्या परिश्रम घेत आहेत.