सविस्तर वृत्त असे की, शहादा तालुक्यातील कलमाडीतर्फे बोरद येथील रहिवासी सुभाष पुंजू भिल हे आपल्या परिवारासोबत २०१९ मध्ये पोटाची खळगी भरण्यासाठी सौराष्ट्र (गुजरात) येथे मजुरीसाठी गेले असता तेथून मुलगी सुनिता सुभाष भिल ही हरवून गेल्याची धक्कादायक घटना घडली होती. आई, वडील, भाऊ यांनी सुनिता हिचा परिसरात शोध घेतला परंतु ती मिळाली नाही. दरम्यान, आई, वडील व भाऊ यांनी आपल्या मुलीला मृत समजून दुःख सहन करीत स्वगृही कलमाडी त.बो. येथे येऊन आपल्या मुलीचे उत्तरकार्यदेखील केले होते.
अन् त्यांना मिळाली मुलगी
सुनिता भिल ही गुजरात राज्यातील मंगल मंदिर मानव सेवा परिवार बगोदरा, ता.बावला, जि.अहमदाबाद येथील सदस्यांना ३१ मे २०१९ रोजी वेडसर अवस्थेत मिळाली होती. सुनिता भिल हिला योग्य ते उपचार केले असता दोन वर्षाच्या कालावधीत सुनिताला आपले नाव व गाव लक्षात आले व तिने संबंधित मंगल मंदिर मानव सेवा संस्थेच्या सदस्यांना सांगितले असता त्यांनी तात्काळ कलमाडी त.बो. गावाचा पत्ता काढून संबंधितांनी प्रकाशा पोलीस दूरक्षेत्राला घटनेची माहिती दिली. आई्वडील व भावाला सुनिता ही जिवंत असल्याची माहिती मिळाली असता त्यांना आनंद झाला.
संस्थेने स्वखर्चाने पोहचविले घरी
मंगल मंदिर मानव सेवा परिवार बगोदरा (गुजरात) येथील सदस्यांनी संस्थेच्या वाहनाने सुनिताला २८ जुलै २०२१ रोजी तिची आई गीताबाई व भाऊ सुनील सुभाष भिल यांच्याकडे कलमाडी त.बो., ता.शहादा येथील घरी विनामूल्य आणून सोडले. त्याबद्दल शहादा पोलीस स्टेशन व कलमाडी ग्रामस्थांतर्फे मंगल मंदिर मानव सेवा परिवार संस्थेचे आभार व्यक्त करण्यात आले.
महिला हेल्पलाईन नंबरवरून मंगल मंदिर मानव सेवा परिवार येथे भ्रमणध्वनीद्वारे एक वेडसर अवस्थेत मुलगी असल्याची माहिती मिळाली असता आमच्या संस्थेत सुनिता नामक मुलीला आणून तिच्यावर उपचार केले. तिला गावाचे नाव लक्षात आल्यावर मी व माझा मुलगा अवध लाठीया सोबत जाऊन सुनिताला तिच्या घरी सुखरूप पोहचविले.
-दिनेश लाठीया, मंगल मंदिर मानव सेवा परिवार बगोदरा (गुजरात)