सुजालपूर, ता.नंदुरबार गावालाही याचा फटका बसला असून, अनेक लोक यामुळे बाधित झालेत. परंतु याचं संक्रमण अधिक पसरू नये आणि लोकांना अजून क्षती पोहचू नये यासाठी सर्व ग्रामस्थांनी एकत्र येत, गावातील सर्व नागरिकांची आरटीपीसीआर तपासणी करण्याचा निर्णय घेतला आणि गावातील सर्व नागरिकांनी या कोरोना महामारीला गावातून हद्दपार करण्यासाठी जिल्हा रूग्णालय नंदुरबार येथे संपर्क करून आरोग्य पथक गावात बोलावून सर्व ग्रामस्थांची कोरोना तपासणी करून घेतली.
यात गावातील १६२ लोकांची तपासणी केली आणि यात काही गावकरी पॉझिटिव्ह आढळले. त्यांना तत्काळ उपचारासाठी विलगीकरण करण्यात आले. ज्यांना तत्काळ उपचार व हाॅस्पिटलची गरज होती त्यांना तशी सुविधा उपलब्ध करून देण्यात आली आणि इतर नागरिकांना यापासून बचावाच्या सूचना व मार्गदर्शन करण्यात आले. तसेच गावात कोरोनाचा अधिक प्रसार होऊ नये यासाठी ग्रामवासीयांनी न घाबरता योग्य वेळेत हा निर्णय घेतल्यामुळे मोठे नुकसान होण्यापासून वाचले.
अशा प्रकारे प्रत्येक गावात व परिसरात सामूहिकरित्या कोरोना तपासणी मोहीम हाती घेतली तर कोरोना व्हायरसचा प्रसार व संक्रमण रोखण्यासाठी निश्चित खूप मोठी मदत होऊ शकेल.
सुजालपूर गावाने घेतलेल्या या निर्णयाचे सर्वत्र स्वागत होत असून, लसीकरणासाठी देखील या गावाने पुढाकार घेतला आहे. यासाठी आवश्यक ऑनलाईन नाव नोंदणी सुरू केलेली आहे आणि तोपर्यंत सर्व नागरिकांना डबल मास्क, सोशल डिस्टन्सिंग, वारंवार हात धुणे हे नियम पाळण्याच्या सूचना देण्यात आल्या असून, गावकरी व मुले स्वयंस्फूर्तीने हे नियम पाळत आहेत. तसेच कोरोना संक्रमण वाढू नये म्हणून सध्या गावात सर्व प्रकारचे सार्वजनिक कार्यक्रम, बैठका, भजन, आदींना स्थगिती देण्यात आली आहे.