ग्रामीण भागात कोरोनाच्या लसीकरण संदर्भात अनेक गैरसमज निर्माण झाले आहेत. हे गैरमज दूर करून ग्रामस्थांची लसीकरणासाठी मानसिक तयारी करण्यासाठी रोटरी क्लब ऑफ नंदनगरी व तथापि ट्रस्ट, पुणे यांच्या संयुक्त विद्यमाने नंदुरबार जिल्ह्याभरात पथनाट्यातून जनजागृती अभियान यात्रा सुरू आहे. या जनजागृती अभियान यात्रेदरम्यान नंदुरबार तालुक्यातील भादवड या गावातील ४५ वर्षावरील नागरिकांनी लसीकरण करून घेतलेले नाही, अश्या नागरिकांचे प्रबोधन करण्यासाठी तसेच त्यांचे लसीकरण संदर्भातील गैरसमज दूर करण्यासाठी स्थानिक भाषेचा वापर करून नाट्यकर्मी नागसेन पेंढारकर यांच्या मार्गदर्शनाखाली चला सुरक्षित होऊ या... या पथनाट्याचा प्रयोग सादर करण्यात येऊन तेथील ग्रामस्थांमध्ये जनजागृती करण्यात आली. या वेळी भालेर केंद्रातील कृतीदल प्रमुख तथा केंद्रप्रमुख वसंत पाटील, भादवडचे सरपंच सविता चंद्रकांत पाटील, बलदाणेचे सरपंच रागिनी पाटील, उपसरपंच, ग्रामपंचायत सर्व सदस्य, पोलीस पाटील अशोक संभू पाटील, ग्रामसेवक अनिल राठोड, तलाठी, कोतवाल प्रमोद पाटील आदी उपस्थित होते.
या जनजागृती रॅलीतून स्थानिक भाषेत नागरिकांना आवाहन करणारे सुमन गावीत, भादवड जिल्हा परिषद शाळेतील मुख्याध्यापक व्ही.एच. वळवी, बलदाने जिल्हा परिषद शाळेतील मुख्याध्यापक सतीष पाटील, छत्रपती शिवाजी हायस्कूलचे मुख्याध्यापक जी.एन. परदेशी, भालेर केंद्रातील कृती दलातील सर्व जिल्हा परिषद शाळा व माध्यमिक शाळेतील शिक्षक, कर्मचारी, गावातील अंगणवाडी सेविका, आशा वर्कर, सामाजिक कार्यकर्ते उपस्थित होते.
या जनजागृती यात्रेदरम्यान भादवड या गावासोबतच बलदाणे, होळतर्फे रनाळे, कलमाडी, खोंडामळी, कोळदे या गावातदेखील पथनाट्य सादर करून जनजागृती करण्यात आली. या पथनाट्यात नागसेन पेंढारकर व नाट्यकर्मी तुषार ठाकरे यांच्या समवेत दर्शन भावसार, कुलभूषण पाटील, तुषार पाटील, जगदीश शिरसाठ, मोहन पाटील, यश पाटील, मयुर सावंत या कलावंतांनी सहभाग घेतला.
रोटरी क्लब ऑफ नंदनगरी व तथापि ट्रस्टची ही कोरोना लसीकरण जनजागृती यात्रा अशीच जिल्ह्याभरात फिरून लसीकरणाविषयी जनजागृती करणार आहे, असे रोटरी क्लब नंदनगरीतर्फे सांगण्यात आले.