नंदुरबार जिल्ह्यात सहा प्रकल्प ओव्हरफ्लो

लोकमत न्यूज नेटवर्कनंदुरबार : नंदुरबार व नवापूर तालुक्यातील अनेक प्रकल्प ओव्हरफ्लो झाले आहेत. परंतु शहादा तालुका आणि नंदुरबार तालुक्यातील पूर्व भागातील प्रकल्पांमध्ये अद्यापही अपेक्षीत पाणीसाठा झाला नसल्याचे चित्र आहे.जिल्ह्यात १५ दिवसांपर्यंत पावसाची तूट ३५ टक्केपर्यंत होती. ती गेल्या १० दिवसात भरून निघाली आहे. गेल्या आठवड्यात जिल्ह्यात पावसाची संततधार होती. काही भागात मुसळधार पाऊस झाला. तर काही भागात मध्यम स्वरूपाचा पाऊस होता. नवापूर तालुक्यात एकाच दिवसात १४० मि.मी.पावसाची नोंद झाली होती. त्याचा परिणाम चांगला झाला आणि नवापूर तालुक्यातील पूर्व भाग तसेच नंदुरबार तालुक्यातील पश्चिम भागातील नदी, नाले दुथडी भरून वाहू लागले. त्याचा परिणाम लघु व मध्यम प्रकल्प तुडूंब भरले. नंदुरबार तालुक्यातील आणि नवापूर व साक्री तालुक्यातील सिमेवर असलेल्या धनीबारा, खोलघर, आंबेबारा हे प्रकल्प ओसंडून वाहू लागले. याच भागातील तसेच नंदुरबार शहराला पाणी पुरवठा करणारा विरचक मध्यम प्रकल्प देखील ७५ टक्केपेक्षा अधीक भरला. या प्रकल्पात पाण्याची आवक सुरूच असल्याने प्रकल्पातून पाण्याचा विसर्ग सुरू करण्यात आला आहे.नवापूर तालुक्यातीलच मध्यम प्रकल्प असलेला रंगावलीतही ९० टक्केपर्यंत पाणीसाठा झाला आहे. शहादा तालुक्यातील दरा प्रकल्पात ७५ टक्के पाणीसाठा झाला आहे. याशिवाय शिरवे, ता.नवापूर, खैरवे, ता.नवापूर, धनपूर, ता.तळोदा, वाघदी, ता.नवापूर, भुरीवेल, ता.नवापूर, राणीपूर, ता.शहादा आदी प्रकल्पांमध्येही ८० टक्केपेक्षा अधीक पाणीसाठा झाला आहे.अद्याप पावसाळ्याचा दीड महिना बाकी आहे. या काळात सरासरीएवढा पाऊस झाला तरी जिल्ह्यातील लघु व मध्यम प्रकल्पांमधील पाणीसाठा हा सरासरी ८० टक्केपेक्षा अधीक राहील अशी शक्यता आहे. त्यामुळे रब्बी हंगामासाठी शेतकऱ्यांना ते फायद्याचे ठरणार आहे.