वाहनाच्या छतावर बसून प्रवास करणे बेतले जिवावर

बालिकेचा मृत्यू : ऊसतोड करुन परतणाऱ्या कुटंबावर ओढवला प्रसंग

लोकमत न्यूज नेटवर्कनंदुरबार : पिकअप वाहनाच्या टपावर बसून प्रवास करणाऱ्या बालिकेला झाडाची फांदी लागल्याने दुखापत होऊन तिचा मृत्यू झाला़ ही घटना सुरवाणी ता़ धडगाव गावाजवळ ८ मार्च रोजी घडली होती़पिंकी उर्फ अश्विनी ओल्या वसावे (१३) असे मयत बालिकेचे नाव आहे़ पिंपळखुटा ता़ अक्कलकुवा येथील ओल्याा पारशी वसावे हे कुटूंबासह पाच महिन्यांपूर्वी पंढरपूर जि़ सोलापूर येथील साखर कारखान्यात ऊसतोडणीसाठी गेले होते़ साखर हंगाम आटोपल्याने ते ७ मार्च रोजी एमएच १३-४२१३ या पिकअप वाहनाने मजूरांच्या टोळीसोबत घराकडे परत निघाले होते़ मजल दर मजल करत ते ८ मार्च रोजी धडगाव तालुक्यातील सुरवाणी गावापर्यंत आले असता, वाहनाच्या टपावर सामान धरुन बसलेल्या अश्विनी हिला झाडाच्या फांदी फटका बसला यात ती वाहनातून थेट रस्त्यावर आदळली़ गंभीर दुखापत झाल्याने तिला तात्त्काळ धडगाव ग्रामीण रुग्णालयात दाखल करण्यात आले होते़ याठिकाणी उपचारादरम्यान प्रकृती गंभीर झाल्याने तिला तातडीने नंदुरबार जिल्हा सामान्या रुग्णालयात हलवण्यात आले होते़ परंतू उपचार सुरु असताना अश्विनी हीचा मृत्यू झाला़या अपघातानंतर वाहनचालक हा वाहन घटनास्थळी सोडून पळून गेला होता़ याप्रकरणी ओल्या वसावे यांंनी धडगाव पोलीस ठाण्यात दिलेल्या फिर्यादीवरुन वाहनचालकाविरोधात गुन्हा दाखल करण्यात आला असून तपास पोलीस हेड कॉन्स्टेबल दिपक करत आहेत़