बेपत्ता युवकाचा मृतदेह आढळल्याने खळबळ

लोकमत न्यूज नेटवर्कमंदाणे : लोंढरे, ता.शहादा येथील धरणात मध्यप्रदेशातील बेपत्ता झालेल्या युवकाचा मृतदेह संशयास्पदरित्या आढळल्याने खळबळ उडाली आहे. याबाबत शहादा पोलिसात अकस्मात मृत्यूची नोंद करण्यात आली आहे.महेश सिताराम पावरा (३४) रा.वायझिरी, ता.पानसेमल (मध्यप्रदेश) असे मयताचे नाव आहे. याबाबत मिळालेल्या माहितीनुसार, लोंढरे धरणात बुधवारी सकाळी महेश पावरा यांचा मृतदेह संशयास्पद स्थितीत आढळून आला. त्याची ओळख पटल्यानंतर त्याच्या कुटूंबियांना कळविण्यात आले. महेश हा चिरखान येथील आत्याकडे आला होता. सोबत एक मित्र देखील होता. आत्याचे घर बंद असल्याने ते लोंढरे धरणाकडे गेल्याचे पोलिसांनी सांगितले. दोन दिवसानंतरही महेश हा गावाकडे परत न आल्याने त्याचा शोध घेण्यात आला, परंतु सापडला नसल्याने पोलिसात बेपत्ता झाल्याची नोंद देखील करण्यात आली होती. त्यानंतर बुधवारी मृतदेह संशयास्पदरित्या सापडला.घटनास्थळी उपविभागीय अधिकारी पुंडलीक सपकाळे, निरिक्षक नजन पाटील यांनी भेट दिली. दरम्यान, महेश सोबतचा मित्र कोण होता त्याचा शोध लागल्याशिवाय घटनेचा उलगडा होणार नसल्यामुळे मित्राचा शोध घेतला जात आहे. पोलिसांनी तपासाला गती दिली आहे.