वैजाली ते प्रकाशा रस्त्याची काथर्दे फाट्यापर्यंत दुरवस्था झाल्याने वाहनधारक त्रस्त

शहादा : तालुक्यातील वैजाली ते प्रकाशा रस्त्याची काथर्दे दिगर फाट्यापर्यंत दुरवस्था झालेली असून, रस्त्यात खड्डे का खड्ड्यांत रस्ता असा प्रश्न वाहनधारकांना पडत आहे. या रस्त्याकडे सार्वजनिक बांधकाम विभाग व संबंधित लोकप्रतिनिधी यांचे पूर्णपणे दुर्लक्ष झाले असून, नागरिकांकडून तीव्र संताप व्यक्त केला जात आहे. गेल्या वर्षभरापासून या रस्त्याची दयनीय अवस्था झालेली असून, रस्त्याच्या मध्यभागी मोठमोठे खड्डे पडले असल्याने दुचाकी व चारचाकी वाहनधारकांना मोठी कसरत करीत वाहने चालवावी लागत आहेत. परिणामी अनेक वाहनांचे नुकसानही झाले असून, नागरिकांनाही पाठीच्या मणक्यांसह व इतर आजारांना सामोरे जावे लागत आहे. या रस्त्याने सातपुड्यातील २५ गावांतील नागरिकांचा जिल्ह्याच्या मुख्यालयाशी रोजचा संपर्क येत असल्याने या मार्गावर वाहनांची रहदारी असते. तसेच उसाच्या गाळप हंगामात उसाची वाहने व अवजड वाहनांचीही या रस्त्याने मोठ्या प्रमाणात वाहतूक सुरू असते. सध्या पावसाळा सुरू असल्याने रस्त्यात मोठमोठे खड्डे पडले असल्याने या खड्ड्यांमध्ये पावसाचे पाणी साचल्याने वाहनधारकांना खड्ड्यांचा अंदाज येत नाही. त्यामुळे नाहक त्रास सहन करावा लागतो. याबाबत सार्वजनिक बांधकाम विभाग व संबंधित लोकप्रतिनिधी यांना प्रत्यक्ष भेटून, निवेदन देऊनही कुठल्याही प्रकारची दखल घेण्यात आलेली नसल्यामुळे नागरिकांमध्ये तीव्र संताप व्यक्त होत आहे. वैजाली-प्रकाशा रस्त्याच्या दुरवस्थेबाबत सार्वजनिक बांधकाम विभागाच्या संबंधित अधिकाऱ्यांनी प्रत्यक्ष भेट देऊन पाहणी करावी व येत्या एक महिन्याच्या आत या रस्त्याच्या दुरुस्तीचे काम न झाल्यास सार्वजनिक बांधकाम विभागाच्या शहादा येथील कार्यालयासमोर तीव्र आंदोलन छेडण्याचा इशारा वैजाली, नांदर्डे, सोनवल, कलमाडी, आदी गावांतील ग्रामस्थांनी दिला आहे.