तळोदा तालुक्यात सोंगाड्या पार्टीकडून प्रबोधन

कोरोना लसीकरणाबाबत गैरसमज दूर होऊन जास्तीतजास्त लसीकरण होण्यासाठी आमदार राजेश पाडवी यांच्याकडून प्रयत्न सुरू आहेत. याआधी त्यांनी लसीकरण करणाऱ्यांना दोन किलो साखर व दोन किलो तांदूळ मोफत देण्याचा उपक्रम सुरू केला आहे. आता तळोदा तालुक्यात आदिवासी जनतेत करमणुकीचे लोकप्रिय साधन असलेल्या सोंगाड्या पार्टीचा कार्यक्रम घेऊन जनजागृती करण्याचा उपक्रम आमदार पाडवी यांच्या पुढाकाराने सुरू झाला आहे. त्याचा शुभारंभ तळोदा तालुक्यातील सोमावल बुद्रुक, मोदलपाडा व रतनपाडा येथून करण्यात आला. सोंगाड्या पार्टीतील कलावंत आदिवासी भाषेत कोरोना लसीकरणाविषयी सविस्तर माहिती देऊन लोकांमधील गैरसमज दूर करीत आहेत. लोकांचेही त्यातून मनोरंजन होत आहे. या वेळी भाजपचे तालुकाध्यक्ष बळीराम पाडवी, स्वीय सहायक वीरसिंग पाडवी, विठ्ठलराव बागले, अदिवासी मोर्चा जिल्हा सचिव नारायण ठाकरे, श्यामा महाराज, पं.स.च्या माजी सदस्या सुबीबाई वळवी, सरपंच वासुदेव वळवी, सुरेश वळवी, सपना वळवी, मानसिंग पाडवी, कांतिलाल पाडवी, छगन कोठारी, सोनू वळवी, दीपक पाडवी, शिक्षक, ग्रामसेवक, तलाठी व ग्रामस्थ उपस्थित होते.