पोलीस पाटील युवकाचे डॉक्टरने केले अपहरण

लोकमत न्यूज नेटवर्कनंदुरबार : बोगस डॉक्टर असल्याचे बोलल्याचा राग येवून पोलीस पाटील युवकास मारहाण करीत त्याचे अपहरण केल्याची फिर्याद राणीपूर, ता.शहादा येथील पोलीस पाटलाच्या आईने म्हसावद पोलीस ठाण्यात दिली. १७ जून रोजी दुपारी ही घटना घडली. याबाबत संबधीत डॉक्टराविरुद्ध अपहरणाचा गुन्हा दाखल करण्यात आला आहे.सुरेंद्र करणसिंग रावताळे, रा.राणीपूर, ता.शहादा असे अपहरण झालेल्या पोलीस पाटील युवकाचे नाव असून दिनेश आपसिंग पावरा, रा.वडफळ्या, ता.धडगाव असे संशयीत आरोपीचे नाव आहे. याबाबत कुसुमबाई करणसिंग रावताळे यांनी दिलेल्या फिर्यादीनुसार, राणीपूर येथे वैद्यकीय व्यवसाय करणारा दिनेश आपसिंग पावरा यांना सुरेंद्र रावताळे हा पोलीस पाटील युवक बोगस डॉक्टर असल्याचे बोलला. त्यामुळे पावरा यांना त्याचा राग आला होता. त्याचा राग मनात कायम धरून त्याच्याशी जवळीक साधली. सुरेंद्र याच्या आईस पावरा याने भेटून डॉक्टरकी व्यवसायात अडथळा आणला तर त्याचा काटा काढल्याशिवाय राहणार नाही अशीही धमकी दिली होती. असे असतांनाही सुरेंद्र याने त्याकडे दुर्लक्ष केले. त्यामुळे १७ रोजी दुपारी दिनेश पावरा यांनी सुरेंद्र यास फूस लावून दुचाकीवर (क्रमांक एमएच ३४-३६९९) बसवून तोरणमाळ परिसरात नेले. तेथे त्याला मारहाण करून डांबून ठेवल्याचे फिर्यादीत म्हटले आहे.कुसूमबाई यांच्या फिर्यादीवरून दिनेश आपसिंग पावरा यांच्याविरुद्ध म्हसावद पोलीस ठाण्यात अपहरणाचा गुन्हा दाखल करण्यात आला आहे. तपास फौजदार देविदास सोनवणे करीत आहे.