सध्या कोरोना संक्रमणामुळे नागरिकांना मोठ्या प्रमाणावर अडचणींचा सामना करावा लागत आहे. आपल्या माणसाला उपचार मिळविण्यासाठी तसेच कोरोनाचा सामना करत असताना नागरिक सैरावैरा धावताना दिसून येत आहे. संपूर्ण देशात ऑक्सिजनचा तुटवडा निर्माण झाला असून, ऑक्सिजन न मिळाल्यामुळे अनेक रुग्णांचा मृत्यू झाला आहे. अनेक जवळच्या रुग्णांना बेड न मिळाल्यामुळे गंभीर परिस्थिती निर्माण झाल्याने जमदाडे यांनी लग्न वाढदिवस साजरा न करता त्यादिवशी २५ वृक्षांचे रोपण करून त्यांचे संगोपन करण्याचा संकल्प घेतला होता. त्यानुसार बुधवारी वृक्षारोपण करण्यात आले.
शहादा शहरातील द्वारकाधीश नगरमध्ये राहणारे दीपक जमदाडे २५ वर्षांपासून वनविभागात कार्यरत आहेत. वनविभागात असल्यानेच त्यांचे वृक्षांची घट्ट नाते आहे. त्यामुळे पत्नी मंगला जमदाडे व कुटुंबीयांनी वेगळ्या पद्धतीने लग्न वाढदिवस साजरा करण्याच्या निर्णय घेत, द्वारकाधीश नगरवासीयांच्या मदतीने बुधवारी खुल्या जागेत शास्त्रोक्त पद्धतीने २५ वृक्षांचे रोपण करण्यात आले. त्यात पिंपळ, वड, उंबर, शिवण, कांचन, निम, रिठा, बेल, शीमल, मोहा, जांभूळ आदी जातींच्या रोपांच्या समावेश आहे.
वृक्षलागवड ही काळाची गरज बनली आहे. स्वच्छ शुद्ध व ताजी हवा राखण्यासाठी वृक्ष महत्त्वाचे आहेत. मोठ्या प्रमाणावर होणारी वृक्षतोड आणि प्रदूषणामुळे निसर्गाच्या मोठ्या प्रमाणावर ऱ्हास होत आहे. या सर्वांमुळे हवामानाच्या लहरीपणा दिसत आहे. त्याचा परिणाम मानवाला दिसू लागला आहे म्हणून वृक्षलागवड व पर्यावरणाच्या समतोल राखण्याची जबाबदारी सर्वांची असल्याचे आवाहन जमदाडे यांनी उपस्थितांना केले.
वृक्षरोपणाप्रसंगी विमलबाई जमदाडे, महेंद्र जमदाडे, जितेंद्र जमदाडे, गौतम जमदाडे, नगरसेविका विद्या जमदाडे, कविता जमदाडे, सुनीता जमदाडे, सुपडू खेडकर, वनपाल प्रवीण वाघ, नंदराव कोते, राजेंद्र साळुंखे, किरण भावसार, मनोज पाटील, के. बी. राजपूत, सुरेश ढोले, उखा जाधव उपस्थित होते.
ऑक्सिजनच्या तुटवडा निर्माण झाल्यानंतर आता सोशल मीडियावर सर्वांकडे झाडे लावा झाडे जगवा, झाडे लावण्याशिवाय पर्याय नाही अशी पोकळ चर्चा सुरू असताना फक्त संदेश न देता प्रत्यक्ष कृतीतून या जोडप्याने झाडांचे महत्त्व पटवून देण्याचा प्रयत्न केला आहे.
प्रतिक्रिया
सध्याच्या परिस्थितीत झाडांचे महत्त्व लक्षात घेता जास्त ऑक्सिजन देणाऱ्या वृक्षांचे रोपण व संगोपन करण्याच्या मानस होता तो आज लग्नाच्या वाढदिवसानिमित्त पूर्ण केला.
- दीपक जमदाडे - वनपाल वनविभाग, शहादा