भरधाव प्रवासी रिक्षा उलटल्याने एक जण ठार

लोकमत न्यूज नेटवर्कनंदुरबार : भरधाव अॅपेरिक्षा उलटल्याने एकजण जागीच ठार तर तीनजण जखमी झाल्याची घटना कालीपाणी, ता.नवापूरनजीक घडली. चालकाविरुद्ध गुन्हा दाखल करण्यात आला आहे. रघू जेत्या नाईक (25) पाटी, ता.नवापूर असे मयताचे नाव आहे. तर किसन मलमजी नाईक, मनिष काशिराम वसावे व वसंत भिमसिंग गावीत असे जखमींची नावे आहेत. नवापूर-विसरवाडी रस्त्यावर 28 रोजी सायंकाळी हा अपघात घडला. वसंत भिमसिंग गावीत याने आपल्या ताब्यातील अॅपेरिक्षा (क्रमांक एमएच 39-1026) प्रवाशांना बसवून भरधाव जात होता. कालीपाणी दर्गाजवळ त्याचा रिक्षावरील ताबा सुटल्याने रिक्षा उलटली. त्यात रघु नाईक हा दाबला गेल्याने त्याचा जागीच मृत्यू झाला. याबाबत मनिष काशिराम वसावे, रा.पाटी, ता.नवापूर यांनी फिर्याद दिल्याने चालक वसंत भिमसिंग गावीत  याच्याविरुद्ध नवापूर पोलिसात गुन्हा दाखल करण्यात आला आहे. तपास हवालदार गिरधर सोनवणे करीत  आहे. दरम्यान, परिसरात अवैध प्रवासी वाहतूक वाढली असून कारवाई करण्याची मागणी होत आहे.